Mès de 1200 persones s’an dat cita aué en Plan de Beret en acte “El Valle Grita”, ena gravacion d’un videoclip collectiu que preten èster un aumenatge ath music Pau Donés, ua persona fòrça estimada e admirada ena Val d’Aran.
Ath long deth maitin s’an amiat a tèrme es gravacions des diferents instruments portadi pes madeishi participants en aguest acte, atau coma era gravacion des veus interpretant ua naua e emocionanta version dera cançon “Grita”. Tanben s’a compdat damb era participacion especiau der Orfeo Lleidatà.
Entara conselhèra Angelina Cases, qu’a participat an aguesta jornada, “aguest aumenatge ère fòrça de besonh pr’amor qu’entara Val d’Aran, Pau Donés, ei e serà tostemp un aranés mès, un aranés que mos deishèc ena sua musica e era sua forma d’enténer era vida un legat plan important”.
Er acte a estat organizat per Pub 43 e Producciones Hilarama, damb era collaboracion deth Conselh Generau d’Aran, Foment Torisme Val d’Aran, er Ajuntament de Naut Aran e Baqueira Beret.
Info: Conselh Generau d’Aran
Fotos: Conselh Generau d’Aran / Ajuntament de Naut Aran