Pendent era amassada d’ager ena tarde es alcaldes pedanis e er alcalde e Vielha e Mijaran acordèren per unanimitat eth refús der Ajuntament de Vielha e Mijaran ara prepausa melhor avalorada peth Ministèri de Foment, nomentada alternativa 4, des quate qu’a presentat pr’amor que represente un gran perilh tath municipi, tant a nivèu paisatgistic coma economic, toristic e sociau.

Er Ajuntament de Vielha e Mijaran amièc a tèrme ager dijaus ena tarde, dera man der alcalde Juan Antonio Serrano e dera dusau tinent d’alcalde Maria Vergés, ua amassada damb toti es presidents des EMD deth municipi entà analizar es quate prepauses qu’eth Ministèri de Foment a presentat entà acondicionar era N230 dera boca nòrd deth tunèl de Vielha enquiara termièra damb França. Aguestes quate prepauses formen part der estudi informatiu d ‘impacte ambientau qu’ara a gessut a exposicion publica.

Toti es presents convengueren que, des quate prepauses, era que compde damb eth vist-e-platz de foment, era alternativa 4, represente un atac dirècte as interèssi deth municipi de Vielha e Mijaran. Atau donc, es alcaldes avalorèren que de totes es alternatives, era que mens impacte produsirie en municipi serie era nomentada alternativa 1, tot e non èster era ideau entà esvitar totaument toti es impactes. En aguest sens cau díder qu’era alternativa 4 a ua longada de 11’65km damb 13 viaductes e circule dera boca nòrd deth tunèl en tot arribar en Betren e passar a Vilac e Aubèrt, tota era peth costat ombrèr. Era alternativa 1, era mens agressiva de totes entar Ajuntament, a ua longada de 10’28km e 8 viaductes, totun circule pera part solana deth municipi.

Entà Juan Antonio Serrano “èm fòrça preocupadi per aguest estudi e per impacte que supause entà Vielha e Mijaran, se pensam a miei e long tèrme, era opcion emparada per Foment resulte ua condemna tath nòste municipi” e higie que “era opcion 1, tot e non èster era mès avienta, ei sense dubte era qu’a un menor impacte socioeconòmic entà Vielha e ath delà, tanben ei era opcion qu’a un cost menor, aproximadament un milion mens qu’es autes opcions”. Atau madeish manifestaue que:” Totunt Foment plantege era opcion 4 coma era melhor mès es alcaldes refusam aguesta opcion de forma rotunda, pr’amor que non contemple eth gran impacte socio economic negatiu que pot auer en territòri e en especiau en Vielha e Mijaran».

Eth tèrme de presentacion des allegacions per part des admintracions acabe dia 2 de mai e es servicis tecnics der Ajuntament, damb eth supòrt des dera Deputacion de Lleida, ja i trabalhen. Atau madeish, es vesins de Vielha e Mijaran tanben pòden realizar es sues pròpries allegacions enquiath proplèu 23 d’abriu e en aguest sens er Ajuntament a metut ara sua disposicion un modèl d’allegacion.

En aguest sens Serrano declaraue “m’agradarie hèr ua crida a toti es vesins de Vielha e Mijaran entà que realizen es sues pròpies allegacions que seran presentades a Foment des deth nòste ajuntament” e higie que arregraïe especiaument “era predisposicion e supòrt des presidents des EMD en aguest ahèr, qu’ei sense dubte un ahèr de país”.

Er alcalde de Vielha e Mijaran a declarat tanben qu’a sollicitat nauament ua amassada urgenta damb eth Ministèri de Foment entà auer mès informacion e hèr a arribar era grana preocupacion deth territòri sus aguest ahèr.

Hònt: Ajuntament de Vielha e Mijaran

Fòto: Nieveaventura.com