Eth President dera Generalitat confirme era sua assisténcia ara celebracion dera Hèsta d’Aran d’enguan, damb motiu deth 25au aniversari dera restitucion deth Conselh Generau d’Aran.
Barcelona, 14 d’abriu de 2016.- Eth sindic d’Aran Carlos Barrera, s’amassèc aué damb eth President dera Generalitat, Carles Puigdemont en Palau dera Generalitat.
Eth sindic d’Aran, expliquèc que pendent era amassada damb eth President, an parlat sus eth hèt que quan eth Parlament e eth Govèrn dera Generalitat atau ac decidiràn, era Val d’Aran participarà en grop d’expèrts qu’aurà d’elaborar es contenguts dera naua constitucion catalana, a fin de cercar er assemblatge dera realitat e era personalitat d’Aran, qu’ei çò que segontes afirmèc eth sindic d’Aran Carlos Barrera, «mos darà ara Val d’Aran era reconeishença identitària e de País».
Per d’auta part, Barrera expliquèc que s’impulsarà era Comission bilaterau entre eth Govèrn dera Generalitat e eth Conselh Generau d’Aran, entà hèr eth seguiment des demandes deth Govèrn d’Aran coma son eth traspàs de competéncies e es ampliaments de finançament des madeishes, e que damb era aprobacion des pressupòsti dera Generalitat en Parlament de Catalonha, tanben s’a d’aprovar es pressupòsti deth Conselh Generau d’Aran, tau coma preve era Naua Lei d’Aran. Un pressupòst qu’entà er exercici 2016 seràn de 22.600.196,50€, a part deth finançament deth hons de cooperacion e des desparièrs convènis que se poguen establir damb es departaments dera Generalitat de Catalonha, donques qu’açò ei çò qu’ara madeish eth Conselh Generau d’Aran a acordat per traspassi de competéncies.
Eth sindic Barrera, informèc ath President Puigdemont que tanben s’aurà de negociar eth pagament per part deth Govèrn dera Generalitat deth deute de 3’8 milions d’èuros que provoquèc era non actualizacion deth finançament deth Conselh Generau d’Aran entre es ans 2007 e 2011; e qu’en aguest madeish periòde demorèc pendent ua inversion en infrastructures de 2.169.335€ que, en moment en qu’es finances deth Govèrn dera Generalitat ac permeten, seràn recuperadi entà inversions d’aguest tipe ena Val d’Aran.
Pendent era amassada, eth sindic d’Aran a explicat ath President qu’ua des prioritats deth Govèrn d’Aran, ei eth bastiment d’ua naua residéncia geriatrica ena Val d’Aran, e qu’a fin d’amiar aguest projècte, eth Conselh Generau d’Aran assumirà eth bastiment, mentre que Puigdemont a confirmat qu’eth Govèrn dera Generalitat se harà cargue deth finançament de 20 places.
En d’aute orde de causes, eth President dera Generalitat li a confirmat ath sindic Barrera, era sua assisténcia ara celebracion dera Hèsta d’Aran d’enguan, damb motiu deth 25au aniversari dera restitucion deth Conselh Generau d’Aran.
Información y fotografías facilitadas por Conselh Generau d’Aran
