Es pòbles de Arres, Arròs e Canejan celebren es sues hèstes majors de Sant Joan d’agost aguest dimèrcles.

Aué dimèrcles 29 d’agost tres poblacions dera Val d’Aran celebren era sua hèsta major en aunor a Sant Joan d’agost, coma sòn Arres, Arròs e Canejan.

Per ua part Arres e Arròs celebren era hèsta pendent dus dies, en Arres ei premanit un programa de hèsta damb era Santa Missa ena Capèla de Sant Fabian e ara seguida se convidarà a còca e moscatelh a toti a compdar des 12:45 ores. Pera tarde concors de botifarra e de Ping-pong ena casa dera Hònt. Pera net session de balh. E entà dijaus, a compdar de meddia jòcs entara mainadèra, concors de brisca e session de balh de tarde e net.

En Arròs, eth dimèrcles tàs 12:00 ores santa missa, processon enquiath santet e aperitiu. Pera tarde passavila, balhs aranesi e session de balh de net. Eth dijaus, hèsta dera esluma, jòcs holables, campionat de petanca e vrespalh damb chicolate e còca.

Canejan sonque se celebre eth dimèrcles era hèsta, damb Santa Missa en aunor a Sant Joan d’Agost damb er acompanhament dera musica Occitana deth grop Arredalh, tàs 11:00 ores e ara seguida Aperitiu aufrit per  Ajuntament de Canejan. Pera net sopar popular e balh.