Eth sindic d’Aran, Carlos Barrera, e era vicepresidenta dera Corporació Catalana de Mitjans Audiovisuals (CCMA), Núria Llorach, an constituït era prumèra comission mixta entre era entitat publica audiovisuau e eth Conselh Generau d’Aran damb er objectiu de fomentar er usatge der aranés en Tv3 e Catalunya Ràdio.
Aguesta “Comission de seguiment der usatge der aranés ena Corporacion Catalana de Mejans Audiovisuaus”, presidida peth Sindic e pera Vicepresidenta dera CCMA, velharà pera produccion de contenguts en aranés e pera promocion d’informacion sus Aran enes mejans dera CCMA. Ara prumèra reünion, a assistit convidat Miquel Àngel Escobar, secretari Administracions Locaus e relacions damb Aran dera Generalitat de Catalunya.
Ena prumèra session, era comission a abordat coma dar mès difusion dera actualitat dera Val d’Aran en airau informatiu e des programes, e hèr mès present era realitat culturau aranesa enes contenguts generalistes de Tv3 e Catalunya Ràdio. Tanben s’a analisat era possibilitat de hèr naui doblatges ar aranés de contenguts infantils adreçadi ath public d’entre 4 e 8 ans. Atau madeish, s’a avalorat era creacion d’ua plataforma digitau que concentre toti es contenguts en aranés produsidi pera CCMA.
Actuauments, era programacion de Tv3 e Catalunya Ràdio aufrís de forma establa contenguts informatius en aranés: ròdes deth 3/24 de deluns a diuendres e ua edicion setmanau d’eth “TN Comarques Val d’Aran”. en Catalunya Ràdio, “Eth Maitin d’Aran” aufrís informacion e format magazine de deluns a diuendres, de 8 a 9 deth maitin, per Catalonha Informacion, era desconnexion entara Val; ath delà deth blòc de “Catalunya Informacion” en aranés de deluns a diuendres de 12.00 a 13.00.
Era comission a abordat coma dar mès difusion dera actualitat dera Val d’Aran en airau informatiu e des programes, e hèr mès present era realitat culturau aranesa enes contenguts generalistes de Tv3 e Catalunya Ràdio
Eth plen deth Conselh Generau d’Aran aprovèc eth passat 4 de mai era designacion des membres dera comission de seguiment der usatge der aranés ena Corporacion Catalana de Mejans Audiovisuaus. Pera part aranesa es integrants dera comission son eth sindic d’Aran, Carlos Barrera, era conselhèra de Torisme e Desvolopament Economic, Anna Díaz, eth conselhèr d’UA-PSC, Francés Boya, e Rosa María Salgueiro, presidenta dera Fondacion Musèu Etnologic dera Val d’Aran.
Toti es contenguts informatius en aranés des mejans dera CCMA se pòden consultar en: http://www.ccma.cat/aranes.
Info: CCMA/Conselh Generau d’Aran
Fotos: CCMA