Aguest gran rèpte qu’amie per nòm “KMS XL LUPUS 2019” preten difóner e dar a conéisher aguesta malautia e requectar sòs entara investigacion e era recèrca a trauès dera practica der espòrt.
Es pròplèu 14, 15 e 16 de junh, Pep Vega, vesin de Vielha e Mijaran, coneishut entre d’autes causes per èster eth director dera entepresa Pedales del Mundo (qu’organize cada an era Pedals de Foc), s’embarque en ua accion solidària pro importanta coma ei completar en tot córrer un torn ath Parc Nacionau d’Aigüestòrtes e Estanh de Sant Maurici, damb er objectiu difóner e dar a conéisher era malautia deth Lupus, atau coma requectar sòs entara investigacion e era recèrca a trauès dera practica der espòrt.
Eth Lupus ei ua malautia que hè part des malauties coneishudes coma autoimmunes sistemiques. Consistís en ua alteracion dera autoimmunitat, pera quau eth pacient fabrique un excès de proteïnes (anticòssi) qu’ataquen a quauques cellules e organs. Es afectacions mès abituaus son enes arnelhs, mès tanben cardiaques, paumonars, articulars, neurologiques e cutànies. Damb tanta diversitat, se pòt díder que cada pacient patís un Lupus diferent. Non ei ua malautia contagiosa e se manifèste entre es 15 e es 40 ans.
Enquiara non s’a trapat cap remèdi entà guarir-la, mès s’a auançat fòrça en sòn tractament. Pep Vega trabalhe damb era Associació Catalana Lupus E.G. (ACLEG), qu’ei ua associacion sense anim de lucre formada per pacients, familhars e professionaus, que trabalhen en benefici des malauts de Lupus, en tot aufrir servicis orientadi ara melhora dera sua qualitat de vida.
Aguesta malautia afècte d’apròp a Pep Vega, pr’amor que sa mair moric en an 1997 precisament d’aguesta malautia, e per aguest motiu, preten completar aguest rèpte entà qu’era sciéncia pogue bèth dia trapar era causa e eth remèdi entà guarir-la.
En aguesti 3 dies que dure eth rèpte, Pep Vega recorrerà un totau de 220 kms damb un desnivèu positiu finau de 5800 mètres
Eth rèpte s’estructure en 3 jornades en tot completar 220 kms e 5800 mètres de desnivèu positiu: Eth 14 de junh, correrà 69,6 kms, en tot gésser des dera Boca Sud deth Tunèl de Vielha enquia finalizar ena zòna de Les Esglésies. Eth 15 de junh, contunharà en tot córrer 61,6 kms entre Les Esglésies e Espot. E, fin finau, eth 16 de junh, gesserà d’Espot entà Vielha, entà finalizar eth rèpte damb es darrèri 66,3 kms.
“Ath long d’aguesta aventura solidària donarè un èuro per cada quilomètre recorregut”, comente Pep Vega. Toti aqueri que volguen collaborar ena investigacion sus aguesta malautia, pòden hèr eth sòn donatiu en següent link: https://www.migranodearena.org/reto/19731/kms-para-el-lupus
Info: Ajuntament de Vielha e Mijaran