Eth Palai de Gèu de Vielha amplie era aufèrta de classes dirigides damb sessions de gimnastica abdominau ipopressiva

A compdar dera pròplèu setmana, en tot coincidir damb er inici deth mes de noveme, eth Palai de Gèu amplie era aufèrta de classes dirigides qu’es usatgèrs pòden gaudir de deluns a diuendres.

Era principau nauetat que s’establís aguesta tardor ei era imparticion de sessions d’exercicis de gimnastica abdominau ipopressiva, que des dera installacion an batiat coma “Hipo&Core”. Era monitora encargada d’impartir aguestes classes serà Esther Vidal, e s’amiaràn a tèrme en següent orari: dimars de 15:30 a 16:30 e de 18:30 a 19:30, e dijaus de 15:30 a 16:30. En totau, 3 ores setmanaus.

Pendent aguestes sessions, er objectiu ei aumentar eth ton abdominau e coma conseqüéncia, tonificar eth solèr pelvic, redusir era centura e previer era incontinéncia d’aurina. Tres causes qu’interèssen fòrça as hemnes qu’acaben d’èster mairs o entren en cicle dera menopàusia, entà recuperar era figura qu’auien abantes des embarassi e eth ton muscular. S’ensenhe a controlar era respiracion e eth diafragma, e a lheuar eth melic entà naut des deth diafragma damb ua respiracion especiau.

D’aute biais, eth Palai de Gèu recupère es classes de iòga, que ja s’auien impartit en ans anteriors. Aguesta activitat serà impartida pera monitora Silvana Penino, damb eth següent orari: dimèrcles de 09:30 a 10:40 e de 17:00 a 18:10, e dijaus de 10:00 a 11:10 e de 11:20 a 12:30. En totau, 4 sessions setmanaus.

Entà reservar era inscripcion a bèra ua des activitats, podetz dirigir-vos ara recepcion deth Palai de Gèu o trucar ath telefòn 973642864.

Des dera installacion tanben se recupère es sessions de iòga, en tot completar un ample calendari fixe d’activitats de deluns a diuendres

Aguestes activitats s’ahigen ath calendari setmanau abituau de classes dirigides que s’amien a tèrme en Palai de Gèu. En aguest sens, eth conjunt de classes dirigides qu’ara madeish s’impartissen ath long dera setmana son: Aquasalut, Stretching, Body Workout, Spinning, Hiit, Zumba, TRX, Aquafit, EFM, Gimnastica Abdominau Ipopressiva, Rhytmic Bounce, Tonofit, Iòga, Powerdumb e Burn Fat.

“Damb aguestes naues activitats, contunham en tot ampliar era varietat de classes dirigides que s’amien a tèrme en Palai de Gèu de Vielha, en tot sajar de corbir totes es disciplines possibles entà poder amassar ara màger diversitat possibla de gent ena installacion”, comente eth dusau tinent d’alcalde e còsso d’espòrts, Alberto López. E hig que “ara madeish auem un pialèr d’activitats dirigides pendent tota era setmana, qu’amassa damb es activitats abituaus deth Palai, l’assoliden coma er equipament esportiu de referéncia ena Val d’Aran”.

Info: Ajuntament de Vielha e Mijaran