Se suspen era activitat des òrgans de govèrn de Vielha e Mijaran pendent er estat d’alarma en tot mantier un comitè de crisi entà gestionar era situacion actuau.
Eth baile der Ajuntament de Vielha e Mijaran a aprovat un decrèt peth quau, mentre sigue vigent er estat d’alarma en tota Espanha, se suspen temporauments era activitat des òrgans de govèrn municipau.
D’aguesta manèra, pendent tot aguest periòde excepcionau, non se realizarà cap junta de govèrn ne plens dera corporacion e se mantierà eth comitè de crisi format per membres der equip de govèrn e tecnics Municipaus.
Atau madeish, damb aguest decrèt tanben se suspen era activitat deth mercat ambulant de Vielha que s’amie a tèrme cada dijaus pendent er estat d’alarma, coma mesura de seguretat en airau sanitari.
D’aute biais, e coma ja s’a anat informant, enes servicis d’atencion ath public der Ajuntament de Vielha e Mijaran s’amiarà a tèrme unicament era atencion telefonica e telematica.
«Des der Ajuntament èm conscienti dera situacion excepcionau que viuem, e en tot èster responsables damb er estat d’alarma vigent, auem decidit postposar tota activitat politica en consistòri, enquia qu’era situacion torne ara normalitat», comente eth baile de Vielha e Mijaran, Juan Antonio Serrano.
[adrotate group=»1″]Info: Ajuntament de Vielha e Mijaran