Er equip de govèrn de Vielha e Mijaran, er arquitècte municipau e era direccion deth centre an visitat eth Palai de Gèu, damb Pompièrs d’Aran, tà establir un protocòu de seguretat d’entrada ena installacion, qu’ei barrada per grèus damatges ena estructura.
En tot moment, er objectiu der equip de govèrn ei tirar endeuant aguesta installacion, qu’ei eth principau centre esportiu de Vielha e Mijaran, e deth conjunt dera Val d’Aran. Mès, ara calerà estudiar e decidir quines actuacions cau desvolopar. En aguest sens, eth baile municipau, Juan Antonio Serrano, ja s’a metut en contacte damb es administracions politiques locaus e superiores entà cercar supòrt economic, pr’amor qu’era realitat dera dimension economica municipau, dificulte qu’er Ajuntament de Vielha e Mijaran pogue èster era unica administracion que pogue suportar economicament era installacion.
Ara demora de poder préner era decision definitiva sus era evolucion deth Palai de Gèu, er equip de govèrn ja trabalhe entà poder mantier diuèrsi servicis, coma son es activitats dirigides en d’auti espacis abilitadi, atau coma er emplec deth gimnàs, en tant que non se trape jos era estructura, entà qu’es usatgèrs poguen contunhar en tot realizar espòrt coma enquiara.
“Èm ara demora de conéisher era solucion tecnica des problèmes estructuraus per part dera empresa especializada, entà poder préner es decisions avientes entà actuar en conseqüéncia e assegurar eth futur dera installacion”, comente eth baile de Vielha e Mijaran, Juan Antonio Serrano.
Info: Ajuntament de Vielha e Mijaran