Era cançon ei òbra deth compositor Jaume Masana Castet e ei basada en poèma “Oxitònia”, de Xavi Gutiérrez, Prèmi Lengua Viua 2019.
Eth grop aranés Es Paums a presentat eth sòn darrèr trebalh musicau “Oxitònia” en format videoclip. Era cançon ei òbra deth compositor Jaume Masana Castet e ei basada en poèma Oxitònia, de Xavi Gutiérrez, Prèmi Lengua Viua 2019.
“Oxitònia” ei interpretada per Es Paums damb era collaboracion de Es Paoesses, era formacion corala de Vilamòs. Aguest ei eth setau trebalh musicau d’un projècte tà …méter musica a poètes aranesi de toti es temps… que comencèc en er an 2016 damb era edicion deth disc CD Era Soca de Nadau. Enquiara an musicat poèmes de Jèp de Montoya, Mossen Condò e Xavi Gutiérrez.
En çò que tanh as imatges deth videoclip an estat filmades, es exteriores en pòble de Vilamòs e es scènes interiores en Musèu Joanchiquet. Era pellicula a estat filmada per Paranoide Films jos era direccion artistica de Mireia Llunell e Jose Bergés damb era collaboracion de Pirineos Drone. En videoclip i actuen ua vintea d’actritzes e actors non professionaus de Vilamòs e dera Val d’Aran.
Eth projècte a compdat damb era collaboracion der Ajuntament de Vilamòs, eth Conselh Generau d’Aran e eth Departament de Cultura dera Generalitat de Catalonha.
«Oxitònia», nominada ara milhor cançon en occitan 2021
Era agéncia de promocion dera lengua occitana, Virasolelh, a convocat eth 2au Prèmi Joan-Pau Verdièr ara milhor cançon en occitan. Entre es 14 tèmes seleccionadi trobam «Oxitònia» d’Es Paums, damb musica de Jaume Masana e letra de Xavi Gutierrez. Ben lèu, eth grop aranés presentarà a un nau projècte. Se ditz «Artz-Ós», sus era hèsta de Magràs en Canejan.
“Oxitònia” se pòt veir en https://youtu.be/qUWpMaAdEsM
Info: Es Paums / Eth Maitin d’Aran