Eth Conselh Generau d’Aran, a trauès deth Musèu dera Val d’Aran, presente un documentau entà compréner era istòria de hè 100 ans. Era commemoracion aurà lòc dissabte, 14 de deseme, entàs 19:00 ores, ena glèisa de Mijaran. Se presentarà eth videodocumentau e se poirà gaudir d’ua petita pèça teatrau entà scenificar aguesti eveniments istorics.

Hè cent ans i auec un abans e un dempús entath país. Era luta des aranesi entà arténher milhors comunicacions ei ua constanta ena istòria dera Val d’Aran, mès entath desvolopament industriau, es interèssi sigueren encara majors. Ei per aquerò que gesseren fòrça projèctes entà connectar milhor era Val damb Catalonha e era rèsta d’Espanha.

Eth prumèr que s’artenhec siguec eth dera carretèra dera Bonaigua, en 1924. Aguesta naua via la inaugurèc eth monarca Alfons XIII. E aguest se i estèc dus dies, ena Val, perque auie hèt era promessa de visitar es pòbles d’Aran e mostrar interès per inquietuds dera comarca. Aguesta visita reiau representèc era oportunitat des aranesi entà reclamar eth tunèl de Vielha, es òbres deth quau comencèren un an dempús.

Tà explicar aguesti hèts en format de commemoracion serà a compdar d’un documentau, titolat: “1924-2024. Un abans e un dempús des comunicacions en Aran”.