Er objècte e era finalitat d’aguesta convocatòria ei contribuïr ara creacion artistica, fomentar er art e era cultura, e promòir e difóner era òbra des artistes aranesi que volguen hèr-la a conéisher mejançant era exposicion collectiva, sense interès lucratiu, que se poirà veir ena sala de Sant Joan d’Arties deth 1 de junhsèga ath 24 d’agost de 2017.
Aguesta cincau edicion aurà coma tematica «Es paisatges ena taula».
Era «Xarxa de Museus d’Etnologia de Catalunya» dera que participe eth Musèu dera Val d’Aran a organizat era exposicion itineranta «Els paisatges a la taula» que des de març de 2016 enquia gèr de 2018 itinère per tot eth territòri catalan.
Era exposicion «Els paisatges a la taula» mòstre es diferenti paisatges dera nòsta gastronomia ath long deth temps, paisatges de montanha, de plana, de còsta… qu’a trauès des sòns cultius pròpis, o arribadi des entorns mès propèrs, an dat lòc a una codina tradicionau, ua manèra de codinar, de conservar, de comerciar, mès tanben ua faiçon de minjar e de relacion sociau e familiara.
Pendent er an 2017 eth Musèu dera Val d’Aran darà un pas endeuant entath coneishement dera nòsta gastronomia e de tot aquerò que s’i relacione, present, passat e futur, com pòt èster era origina des productes (cultius, pagesia, importacion…), es tecniques d’elaboracion e conservacion, era faiçon de parar era taula (vaishèra, tovalhons…), er acte de minjar, eth comèrç… Eth musèu vò dar a conéisher a trauès d’un miralh dubèrt ath public era nòsta tradicion gastronomica, es sues influéncies, es sòns condicionants, mès non des deth sòn versant extrictament culinari senon tanben des deth versant uman de relacion sociau e familiara, e tot açò sense descuedar era evolucion d’aguesta gastronomia e era sua innovacion.
Ei per aguest motiu qu’enguan es òbres presentadas entara mòstra s’auràn de relacionar damb aguesta tematica.
Es persones destinatàries son es artistes majors d´edat dera Val d’Aran (neishudi en Aran o qu’actuaument i demoren, en aguest darrèr cas calerà presentar eth certificat d´empadronament).
Entà garantir era difusion e coneishement d´aguestes bases, aguestes seràn publicades ena plana web deth Conselh Generau d´Aran (www.aran.org) en taulon d´anoncis dera Corporacion, enes mejans de comunicacion escrita de difusion locau e en huelheton corresponent.