Era gestion amiada a tèrme pera equipa de govèrn pendent 2016 a permetut que Vielha se place ath capdauant deth listat des capitaus mens endeutades de Lleida tot e auer agut d’assomir es crèdits bancaris deth Palai de Gèu.
Eth Ministèri d’Isenda a hèt publiques es donades de 2016 deth deute viu des Ajuntaments damb era banca per abitant. En aguestes donades se compròve qu’er Ajuntament de Vielha e Mijaran ei eth mens endeutat de tota era provincia de Lleida, damb un passiu de 19€ per abitant.
Ath delà deth compliment dera estricta normativa estatau qu’obligue as ajuntaments a destinar eth sòn superàbit ara amortizacion de crèdits e deutes bancaris, era gestion portada a tèrme des dera equipa de govèrn der Ajuntament de Vielha e Mijaran a permetut qu’aguest municipi se trape entestant ara eth listat des capitaus mens endeutades dera provincia de Lleida.
“En 2016 er Ajuntament de Vielha e Mijaran auec d’assomir es 462.000€ provinents des crèdits bancaris a nòm de VIGESA, empresa que gestionaue eth Palai de Gèu, causa que dificultèc enormement era gestion municipau entre 2016 e 2017” manifestaue Juan Antonio Serrano, alcalde de Vielha e Mijaran, “Totun, e a despièch qu’açò a condicionat en grana mesura era activitat municipau, auem realizat un gran esfòrç entà qu’aguest important contratemps non repercutisse ena ciutadania e pròva d’açò n’ei aguest resultat d’un endeutament 19€ per abitant,
causa que celebram” higie Serrano.
Info: Ajuntament de Vielha e Mijaran