Era Audiovisuau de Vielha torne a daurir es sues pòrtes er 1 d’agost, e ac hè en tot aufrir ua grana estrea damb era projeccion dera pellicula de comédia «Padre no hay más que uno 2: La Llegada de la suegra», era darrèra pellicula de Santiago Segura.
La podetz gaudir damb totes es mesures sanitàries der 1 ath 4 d’agost entàs 19:30 e ath prètz unic de 5,90€.
Arrebrembatz qu’es sètis son limitadi pera vòsta seguretat e er emplec de mascareta ei obligatòri.
Podetz crompar es vòstes entrades en: http://ow.ly/ELEU50ANHjQ
Era collaboracion der Ajuntament de Vielha e Mijaran damb eth Circuit Urgellenc permet tornar a daurir aguest equipament municipau damb cèrtes mesures de seguretat entà previer eth contagi dera COVID-19.
Se torne a daurir en tot priorizar era seguretat des sòns usatgèrs, damb era aplicacion des mesures vigentes aué dia. En aguest sens, a compdar d’ara s’aurà de deishar era distància de seguretat d’1,5 mètres entre es cagires dera sala, de manèra qu’era capacitat totau serà ath torn d’un tèrç per session. Era excepcion serà entàs membres d’ua madeisha familha que òc que poiràn setiar-se amassa. Ath delà, tanben serà obligatòri er emplec dera mascarèta pendent era projeccion des pellicules.
“Entà Vielha e Mijaran e tota era Val d’Aran, era dubertura de Era Audiovisuau ei ua grana e demorada notícia, pr’amor qu’ei eth principau equipament culturau municipau, que compde damb fòrça istòria, e toti desirauem poder tornar a gaudir des sues projeccions”, comente eth baile de Vielha e Mijaran, Juan Antonio Serrano. E hig que “s’a adaptat era installacion as mesures de seguretat vigentes pera COVID-19 e, per tant, demanam as usatgèrs que siguen conscients der esfòrç que s’a hèt entà daurir-la, e que suenhen de mantier-la enes melhores condicions possibles, en tot respectar es sues normes. Tanben demoram que non i agen mès rebròts pera pandémia, e que se pogue mantier dubèrta”.
Info: Ajuntament de Vielha e Mijaran/Jaume Turmo