Eth sindic d’Aran, Francés Boya, e era conselhèra d’Igualtat, Salut e Benèster, Maria Vergés, s’amassèren eth passat 8 de gèr, damb eth secretari de Salut Publica dera Generalitat, Joan Guix, entà parlar sus eth trabalh en airau de salut publica amiat a tèrme peth Conselh Generau d’Aran, a trauès deth Servici Aranés de Benèster e Salut (SABS).

Pendent era amassada ena que preneren part tanben era directora deth SABS, Maria Àngels Borràs,  eth responsable de Relacions Institucionaus e Programes dera Secretaria de Salut Publica, Josep Maria Pons, e era subdirectora regional de Salut Publica en Lhèida e eth Naut Pirenèu e Aran, Mercè Bieto, entre d’auti, se metec de relèu eth besonh de desvolopar accions en matèria de salut publica a trauès d’un Plan de Salut Publica dera Val d’Aran atau coma impulsar era vision comunitària dera salut en tot includir tanben er airau d’atencion primària.

Prèvimament ad aguesta amassada s’amièc a tèrme ua amassada ena qu’i participèren tanben es responsables tecnics de salut publica en Aran atau coma representants der airau d’atencion primària d’Aran Salut.

Era conselhèra Maria Vergés a volut arregrair “era disponibilitat e predisposicion dera secretaria de Salut Publica catalana entà dar supòrt ath Conselh Generau d’Aran” e a afirmat qu’eth govèrn d’Aran “a intencion d’impulsar diuèrses accions en aguest airau”.  Atau madeish, tanben a manifestat “eth besonh de trabalhar conjuntament damb es ajuntaments aranesi, que son es competents entà prestar servicis minims en matèria de salut publica, entà desvolopar totes es accions de besonh en aguest airau”.

Info: Conselh Generau d’Aran