Era Comission Territoriau d’Urbanisme dera Val d’Aran, amassada aué, a aprovat definitiuaments era modificacion des Nòrmes Subsidiàries de Planejament relatives ara regulacion dera preservacion e recuperacion des bòrdes e cabanes en solèr non urbanizable, aplicables as municipis d’Arres, Bausen, Bossòst, Es Bòrdes, Canejan, Les, Vielha e Mijaran, Vilamòs, e Naut Aran, entà adaptar-les as determinacions deth vigent Plan Director Urbanistic dera Val d’Aran. Era nòrma regirà sus es bòrdes e cabanes anteriores a 1969 en cas de Naut Aran, e de 1982 en rèste deth territòri.

Ath finalizar era session dera Comission Territoriau d’Urbanisme, eth director generau d’Organizacion deth Territòri e Urbanisme, Agustí Serra, a destacat er excellent trabalh realizat pendent aguesti ans peth Conselh Generau d’Aran en coordinacion damb es ajuntaments aranesi, entara aprobacion d’aguesta naua regulacion des bòrdes e cabanes, en tot ahíger qu’ei ua bona notícia entà qu’era gent d’Aran pogue gaudir der emplec ludic-familhau d’aguesti bastiments. Agustí Serra, a volut remercar, qu’en cap cas aguesta regulacion permet destinar es bòrdes e cabanes ar emplec coma abitatge.

Pera sua part eth sindic d’Aran, Carlos Barrera, expliquèc qu’era aprobacion normativa d’aué, dempús de 7 ans de trabalh, a resolvut era volontat unanima de hèr possible ua solucion legau ath conflicte qu’afectaue a un gran nombre de proprietaris qu’auien intervengut ena sua bòrda o cabana sense auer cap cobertura legau, e dusau, atau madeish pacificar sociauments aguest problèma que non a bric que veir damb es edificacions de naua planta.

Eth sindic d’Aran, a destacat qu’era regulacion compòrte era creacion d’ua Comission de Seguiment integrat peth Conselh Generau e es ajuntaments que velharà peth seguiment e era evolucion dera aplicacion dera nòrma. Aguesta comission s’amassarà un còp ar an.

Eth Departament de Territòri e Sostenibilitat aprovèc eth PDU en mes de junh de 2010 e ac modifiquèc en 2014, entre d’auti, entà fixar es critèris d’emplec e recuperacion des bastiments agroramadèrs e favorir era sua preservacion per arrasons arquitectoniques, istoriques, ambientaus, païsatgistiques o sociaus.

Entà impulsar era recuperacion der auviatge rurau, eth PDU velhe entà qu’aguesti bastiments en solèr non urbanizable mantenguen eth caractèr non residenciau e daurís, ath madeish temps, un ventalh de naues possibilitats entà impulsar era sua reconstruccion. Aguesti critèris sigueren acordadi per consens peth Departament de Territòri, es ajuntaments dera Val d’Aran, eth Conselh Generau d’Aran, eth collectiu de tecnics damb preséncia en Aran e era Comission d’Auvitatge der Aran.

Dempús de fòrça reünions tecniques s’acordèc per consensus era definicion d’emplec ludic familhau, entà motivar dus aspèctes fonamentaus de çò que representen es bòrdes e cabanes de montanha, coma auviatge culturau e economic, en tot arrebrembar sègles enreire, e er emplec de pervivéncia qu’aguestes edificacions representauen entara economia des familhes, en tot perméter eth profitament agricòla e pagés de nauta montanha.

Atau, a compdar d’ara, es ajuntaments poderàn autorizar es intervencions de mantenença o de conservacion entà emplec ludic o pagés, atau coma es accions de reconstruccion de rèstes d’edificacions existentes.

Era Comission d’Urbanisme dera Val d’Aran a aprovat definitiuaments dus plans especiaus urbanistics ena zòna de Beret. Eth projècte entara dubertura de 5 naues pistes d’esquí ena zòna de Pla de Beret, entre era còta 1.847 e 2.100, restacades damb era autorizacion deth bastiment d’un nau telecagira de tres places qu’era Comission ja aprovèc en an 2016, e eth projècte d’un telesquí en Òrri, que pòrte associades 3 naues pistes 

Per d’auta part, era Comission Territoriau d’Urbanisme, a tractat aué er auanç deth Plan d’organizacion urbanistica municipau (POUM) de Naut Aran. En aguest sens, Agustí Serra expliquèc qu’era Comission d’Urbanisme a avalorat positivaments aguesta prumèra prepausa, que sage de dotar ath Naut Aran de mès espacis publics entà melhorar era mobilitat e eth parcatge enes sòns nuclèus urbans, ena linha de çò que ja apunte era futura Lei de Territòri ena que trabalhe eth Departament de Territòri e Sostenibilitat dera Generalitat entà tota Catalonha.

Fin finau, era Comission d’Urbanisme dera Val d’Aran, a aprovat definitiuaments dus plans especiaus urbanistics ena zòna de Beret. Per un costat, era aprobacion deth projècte entara dubertura de 5 naues pistes d’esquí ena zòna de Pla de Beret, entre era còta 1.847 e 2.100, restacades damb era autorizacion deth bastiment d’un nau telecagira de tres places qu’era Comission ja aprovèc en an 2016. Es naues pistes aucuparàn ua extension d’apuprètz 14 Ectares.

E per d’auta part, era aprobacion deth projècte d’un telesquí en Òrri, que pòrte associades 3 naues pistes. Eth telesquí aurà ua longitud de 2.600m.

Era prevision ei qu’era estacion d’esquí de Baqueira Beret, un còp obtengut era licéncia d’òbres, pogue daurir aguestes naues pistes eth pròplèu iuèrn, dempús d’ua inversion de 900.000 €.

Info: Conselh Generau d’Aran