Es òbres tara installacion dera caudèra de biomassa s’amien a tèrme en parcatge de darrèr der Espitau Val d’Aran.
Actuaument, era despena en calefaccion der Espitau Val d’Aran ei d’uns 154.166 litres de gasòli cada an, e damb aguesta òbra se calcule que s’estauviaràn annaument ues 442,14 tones de CO2.
Aguest hèt represente ua reduccion d’emissions de carbòni ena atmosfèra, que son es que provòquen er efècte ivernacle e eth cambi climatic, e des emissions d’SO2, responsables dera ploja acida. En cambi, era combustion de biomassa barre eth cicle naturau de carbòni, redusís eth risc d’erosion e d’incendis forestaus e milhore era qualificacion energetica des edificis.
Aguest projècte a favor des energies renovables impulsat peth Conselh Generau d’Aran a coma principaus objectius
– Era reduccion dera peada de carbòni d’Aran
– Era dinamizacion deth mercat forestau valorizant-ne es productes derivadi
– Era reduccion dera dependéncia energetica
– Eth foment deth desvolopament dera activitat industriau en nòste territòri.
En referéncia ath sector sociau, aguesta inversion en biomassa generarà naui lòcs de trabalh enes zònes ruraus, crearà naui servicis restacadi damb aguest airau en Aran e daurirà un camp important tara innovacion.
Eth govèrn d’Aran considère qu’aguesta importanta transformacion energetica en un endret damb un mèdi naturau privilegiat com era Val d’Aran ei essenciau tà bastir un desvolopament sostenible e respectuós damb era natura.
Info: Conselh Generau d’Aran