Er Institut d’Estudis Aranesi-Acadèmia aranesa dera lengua occitana organize, damb motiu dera Hèsta d’Aran, era conferéncia “Mn. Jusèp Condò e era musica” qu’impartirà Tònho Castèt, collaborador der IEA.
Era conferéncia que debanarà ena glèisa de Montcorbau, pòble natau de Jusèp Condò eth pròplèu dia 17 de junh as 19:00 ores, serà presentada peth president der IEA-Acadèmia aranesa dera lengua occitana, Jusèp Loís Sans.
Er acte, que vò dar contengut culturau e intellectuau ara Hèsta d’Aran, compde damb era collaboracion der Archiprestat dera Val d’Aran.
Mossen Jusèp Condò Sambeat (1867-1919), deth qu’enguan se commemòre eth centenari dera sua mòrt, siguec un sacerdòt, poèta e tanben musician, considerat eth prumèr escrivan en utilizar er aranés coma lengua literària. Siguec collaborador de desparières publicacions literàries e autor d’importants poèmes en occitan. Tanben escriuec condes cuerti, roman e teatre. En an 1912, guanhèc eth Prèmi des Jòcs Floraus de Tolosa damb eth poemari “Era Val d’Aran”. Dera sua vasta òbra destaque tanben eth “Vocabulari aranés”, publicat en 1915.
Er amor ara tèrra que lo vedec nèisher, ath paisatge aranés, ara sua lengua e era sua gent, definissen era òbra de Condò que deishèc tanben per escrit costums araneses e condes deth país.
Jusèp Condò moric eth 5 d’agost de 1919 ara edat de 52 ans e siguec enterrat en Bossòst.
Info: IEA-Acadèmia aranesa dera lengua occitana