Eth partit aranés de Convergéncia Aranesa en tot analisar eth naut indèx de rebròt de COVID-19 que i a en territòri dera Val d’Aran demane ath Conselh Generau d’Aran que se hèsque ua dusau pròva PCR as persones qu’agen dat positiu e agen superat eth periòde de 14 dies de confinament o quarentena. Ua demana qu’eth Govèrn deth Conselh Generau d’Aran dejà a hèt arribar ath departament de Salut dera Generalitat.

Aguesta mesura se sollicite perqué se considère que, tot e auer ua carga virau mès baisha, ei possible qu’aguestes persones gesquen en carrèr e poguen contunhar d’èster transmissors deth coronavirus en tot méter en risc era salut publica des vesins dera Val d’Aran.

Aué madeish, eth territòri aranés a superat es 2000 punts d’indèx de rebròt e supère en mès deth doble ara següenta comarca catalana, qu’en aguest cas ei Era Cerdanha damb 973 punts. Ad açò, se li some era entrada dera varianta britanica era quau, segontes eth pròpri Conselh Generau, de 24 mòstres que se preneren, 92% èren d’aguesta mutacion.

Des de de Convergéncia Aranesa demanam responses inmediates des deth govèrn aranés entà acabar damb aguest naut ritme de contagis e auer un major contròl dera pandèmia en nòste territòri. Aguesta mesura l’auràn de reclamar ath Departament de Salut dera Generalitat de Catalonha entà que pogue èster acceptada, pr’amor que son es qu’an aguesta competéncia concrèta.

Eth pòrtavotz de Convergéncia Aranesa, César Ruiz-Canela, destaque que “cau frenar era transmission deth virus pr’amor que portam diuèrses setmanes en qu’era incidencia non pare de pujar. Auem de besonh bèra naua mesura que sigue efectiva e pogue vederse reflectida en uns milhors resultats”.

Ath delà, ahig que “aguesta naua varianta britanica ei mès virulenta e non coneishem reauments er impacte que pòt auer un còp a passat eth periòde de quarentena, ei per açò que demanam ath Conselh que sollicite ara Generalitat mès mesures coma ua dusau PCR entà pacients positius”.

Pera sua part, eth govèrn deth Conselh Generau a hèt arribar ath departament de Salut aguesta demana de Convergéncia Aranesa.

Eth govèrn d’Aran arregraís eth supòrt deth grup de Convergéncia Aranesa en tot higer-se ath trabalh qu’eth govèrn aranés pòrte amiant a tèrme der inici dera pandemia ençà enes demanes ara Generalitat entà balhar solucions ara situacion epidemica en Aran.

Era sindica d’Aran, Maria Vergés, a hèt extensiva ath departament de Salut dera Generalitat era demana hèta enes mieis de comunicacion peth grop de Convergéncia Aranesa entà que se càmbie eth protocòl actuau e se realize ua dusau pròva PCR en finalizar eth periòde de quarantena.

Entath govèrn deth Conselh Generau d’Aran quinsevolh accion o mesura destinada a melhorar era actuau situacion epidemiologica en Aran ei ben recebuda e s’a mostrat satisfèt qu’eth grup dera oposicion se hige ath trabalh qu’eth govèrn aranés desvolope der inici dera pandemia ençà.

Info: Convergéncia Aranesa/Conselh Generau d’Aran