Er Ajuntament de Bossòst a començat a rendir tribut a Mossen Jusèp Condò Sambeat (Montcorbau, 1867 – Bossòst, 1919), escrivan e poèta aranés, per miei de diuèrses accions de difusion dera sua figura enes hilats sociaus. Condò ei ua des personalitats insignes dera cultura aranesa qu’a elevat er aranés ara forma literària, per miei d’ua òbra diuèrsa de pròsa e poesia. Entre aguesta, destaquen es títols Era isla des diamants, Era Maladeta, Era net de Sant Joan, Era lengua aranesa, Era Val d’Aran o Cançon dera Garona. Premiat en an 1915 pes Jocs Florals de Barcelona, prenec part dera Escòlo dera Pirineos, institucion restacada damb eth Felibritge gascon entara renaishença dera lengua.
Atau madeish, er Ajuntament de Bossòst a previst d’organizar un acte de reconeishement e commemoracion d’aguest destacat aniversari. “Mossen Condò morís e ei enterrat en Bossòst quan ère rector, en an 2013 dignifiquèrem era sua hòssa amassa damb er Archiprestat, e compde damb un carrèr dedicat, e per aquèro tà nosati ei fòrça important rebrembar e reconéisher eth legat d’un des sòns hilhs illustres, encara que neishut en Montcorbau, mès aranés universau, qu’a contribusit a recuperar era nòsta lengua e a dignificar era nòsta cultura”, a explicat er alcalde, Amador Marqués.
