Er equip de govèrn der ajuntament de Les a presentat a aprovacion eth pressupòst mès naut dera sua istòria, damb ua chifa qu’ascendís a mès de 2.900.000,00€ e que contemple inversions destacades entà hèr front ara reactivacion economica atau coma partides importantes entà dar supòrt as familhes afectades pera crisi dera COVID-19.

Pendent eth plen der ajuntament de Les celebrat aué, s’a aprovat eth pressupòst tà 2021 d’aguest consistòri, que preten balhar cobertura ad aqueres emergéncies sociaus provocades pera crisi deth COVID-19, damb partides destinades ath supòrt sociau. Atau madeish, tanben destaquen es inversions en renauiment e bastiment d’infraestructures publiques.

En aguest sens, er equip de govèrn d’UA en Les, vò remercar tres grani èshi d’actuacion:

– Era inversion en patrimòni culturau. Coma ei eth projècte de reabilitacion deth Castèth de Pijauèrt de Les, que non sonque preten preservar er auviatge aranés, se non que tanben se convertís en un esturment de dinamizacion toristica.

– Era inversion en infraestructures publiques. Coma ei eth bastiment d’ua pista poliesportiva barrada, entar usatge des vesins e vesies, e que permet fomentar ua activitat saludable, ath delà de captar diuèrses entitats esportives entà que demoren en municipi, stages, pretempsades, eca.

–  Era inversion en desvolupament des poligons industriaus e des equipaments, en tot adequar eth centre d’activitats tà potenciar era implementacion d’enterpreses.

Er equip de govèrn der ajuntament de Les a presentat a aprovacion eth pressupòst mès naut dera sua istòria, damb ua chifa qu’ascendís a mès de 2.900.000,00€ e que contemple inversions destacades entà hèr front ara reactivacion economica

Ath delà, era aprovacion d’aguest pressupòst permeterà ar Ajuntament de Les realizar es projèctes de melhora, acondicionament e mantenement previsti. Compde damb ua importanta inversion en renauiment de carrèrs, coma ei era pavimentacion e adequacion deth carrèr Aran e era Plaça dera Generalitat, era fasa I dera reabilitacion deth carrèr dera Carrèra, era melhora dera zona esportiua, eth recrescut deth mur dera Garona ena zòna de Paisàs e era reabilitacion e adequacion des parcs infantils e ludics.

Er ajuntament de Les tanben invertirà en:

– Servici d’aigües, en tot melhorar e adequar es captacions e er hilat de provediment e eth depòsit d’aigua dera Cauvèra.

– Ena sala polivalent en tot melhorar es barratges e er estauvi energetic, e era pavimentacion deth solèr.

– En bastiment d’ua nau de servicis e magasèm.

– Se adequarà e reformarà era planta baisha der Ajuntament de Les.

– Se adequarà eth pati dera escòla mairau.

Er equip de govèrn vò destacar era grana repercussion deth pressupòst der exercici 2021 entà Les, en uns tempsi mercats pera crisi sanitària e sociau deth COVID-19. “Conscients dera situacion ena que mos trapam, eth municipi se premanís entà afrontar es rèptes qu’aguesta crisi a portat. Per aquerò aguesti pressupòsti, son uns pressupòsti adaptats ara actuau situacion, e plantejats entà reactivar era economia locau, atau coma balhar supòrt as sectors mès afectadi e especiaument as familhes”, declare er alcalde, Andreu Cortés.

Info: Ajuntament de Les / Unitat d’Aran