Era Brigada Municipau trabalhe ena desinfeccion de tot eth mobiliari urban, carrèrs, entorns der espitau e geriatric, e ièrles de lordères, entre d’auti, autant de Vielha coma dera rèsta de pòbles deth municipi entà previer es contagis deth coronavirus.
Pendent aguesta setmana, er Ajuntament de Vielha e Mijaran a començat un intens plan de desinfeccion des espacis publics de tot eth municipi coma mesura de prevencion de contagi deth coronavirus COVID-19.
En aguest sens, era Brigada Municipau trabalhe en tot eth mobiliari urban, carrèrs e ièrles de lordères, en tot incidir, sus tot, enes espacis sanitaris coma son er entorn der Espitau Val d’Aran e dera Residéncia Geriatrica Sant Antòni de Vielha, pr’amor qu’ei a on mès gent vulnerable i pòt auer pendent eth temps que dure er estat d’alarma.
Aguesta actuacion s’amie a terme a diari en Vielha, mentre qu’ena rèsta de pòbles se realizarà un viatge ara setmana, entà poder dar cobertura a toti es pòbles deth municipi.
“Aguest plan de desinfeccion qu’auem encetat aguesta setmana ei ua mesura fòrça de besonh entà mantier era via publica enes melhores condicions igieniques e sanitàries, sus tot, en aqueri emplaçaments apròp dera gent que pòt èster vulnerable ath contagi”, comente eth baile de Vielha e Mijaran, Juan Antonio Serrano. E hig que “toti/es auem d’èster conscienti/es deth moment que viuem. A despièch d’auer es espacis publics en bones condicions, auem de mantier eth confinament establit, e gésser en carrèr sonque enes casi permetudi”.
Info: Ajuntament de Vielha e Mijaran
Fotos: Ajuntament de Vielha e Mijaran/Tay Fernández