Er equipament non auie passat cap inspeccion tecnica de 2005 ençà, çò qu’obligue a invertir aguesti recorsi entà regularizar era situacion abantes de poder amiar-i a tèrme quinsevolh auta melhora e de trèir a licitacion era sua gestion,

 

 

A finaus de 2016 er Equip de Govèrn recebec es conclosions dera auditoria tecnica qu’auie encomanat tà conéisher era actuau situacion e es besonhs d’inversion qu’auie eth Palai de Gèu abantes de trèir a concors public era sua gestion. En aguest estudi tecnic se confirmèc eth besonh de realizar òbres d’urgéncia, coma siguec eth cambi dera cortina de separacion dera pista de gèu e era piscina, qu’er Ajuntament de Vielha e Mijaran realizèc eth passat mes de deseme damb un còst de 80.905€ pr’amor qu’eth sòn estat comprometie era seguretat des usatgèrs.

Aguest madeish estudi tanben a metut de manifèst qu’eth Palai de Gèu non s’auie sosmetut a cap inspeccion electrica d’ençà de 2005, hèt peth quau era ECA, er organisme que realize eth contròl des installacions, a dat sies mesi de plaç ar Ajuntament entà regularizar era situacion.

 

 

Entà Juan Antonio Serrano, alcalde de Vielha e Mijaran “aguesta situacion demòstre un viatge mès era manca de responsabilitat qu’a imperat ena gestion d’aguest equipament pendent es darrèri ans” e higie que “auem eredat ua situacion fòrça complèxa, de fòrça ans sense que se realizèsse inversion ne manteniment a hons des installacions, e qu’enguan mos obligue, coma dejà passèc er an passat damb es òbres de 30.000€ ena piscina, a invertir fòrça recorsi tà solucionar es problèmes d’aguesta installacion, causa que condicione que se poguen dedicar a un aute tipe d’accions en municipi”.

Er 1 de gèr de 2017 er Ajuntament de Vielha e Mijaran assomie intregrament era gestion deth Palai de Gèu, dempús d’auer-se amiat a tèrme era dissolucion de VIGESA, “des der Equip de Govern der Ajuntament de Vielha e Mijaran trabalham damb grana intensitat entà mantier eth Palai de Gèu en funcionament e tà poder conservar tanben toti es lòcs de trabalh que ne depenen, pr’amor qu’èm totaument convençudi dera importància sociau e economica qu’aguest equipament a tath municipi e tara Val d’Aran”.

Eth passat dimèrcles 22 de març eth Plen der Ajuntament de Vielha e Mijaran aprobaue era modificacion de crèdit deth pressupòst deth consistori que, entre d’auti ahèrs, confirmaue era cancelacion deth deute bancari qu’auie eth Palai de Gèu, e qu’ascendie a 462.000€.

Hònt: Ajuntament de Vielha e Mijaran