Ath delà ena darrèra session dera Comission Assessora, s’aprovèc er avant-projècte deth Centre Archiprestau dera Val d’Aran en Vielha.

Eth passat dimèrcles, 19 de hereuèr, auec lòc era session dera Comission Assessora der Auviatge dera Val d’Aran, presidida peth sindic d’Aran, Francés Boya, era conselhèra de Coneishement, Angelina Cases, e que compdèc tanben damb era preséncia dera directora generau de Patrimòni Culturau dera Generalitat, Elsa Ibar, e eth director des Servicis Territoriaus de Cultura en Lhèida, Miquel Àngel Cullerés, ath delà des tecnics e tecniques deth Conselh Generau.

En aguesta amassada s’aprovèc er avant-projècte deth Centre Archiprestau dera Val d’Aran en Vielha, peth quau se contemple eth bastiment d’ua naua edificacion ath costat dera Glèisa de Sant Miquèu entà plaçar diuèrses sales d’amassades, atau coma er archiu. Aguest projècte contemple tanben era creacion d’ua avenguda entà júnher era Plaça Còto Março e eth cementèri, en tot plaçar aguesta naua edificacion ena linha dera avenguda e dignificar era zòna.

Entre d’autes causes, s’acordèc tanben realizar un informe tecnic entara declaracion de Ben Culturau d’Interès Locau (BCIL) en Bausen dera glèisa parroquiau de Sant Pèir, eth cementèri, era capèla de Sant Ròc, eth cementèri civiu de Teresa e era capèla de Santa Anna; e un aute informe entara declaracion dera Casa deth Senhor d’Arròs coma BCIL.

En acabar era amassada, era conselhèra Cases acompanhèc ara directora generau e eth director des Servicis Territoriaus a Les, a on assistiren ara presentacion deth projècte arquitectonic dera Casa der Haro, a on siguec present tanben eth sindic d’Aran, e visitèren eth Castèth de Pijuert, dus des grani atractius istorics e culturaus deth pòble.

Info: Conselh Generau d’Aran