Pendent es pròplèu setmanes, era Escòla Mairau Municipau de Vielha e Mijaran compdarà damb ua Escòla de Pairs. Aguesta iniciativa preten èster un espaci d’informacion, formacion e reflexion dirigida a pairs e mairs, sus aspèctes restacadi damb es foncions parentaus. Se tracte d’un recors de supòrt as familhes damb menors entà que poguen desvolopar adequadaments es sues foncions educatives e socializadores.
En marc d’aguesta Escòla s’amiaràn a tèrme talhèrs, charrades e d’autes activitats de formacion, impartides per professionaus e especialistes, destinades a qu’es pairs e mairs dera Escòla Mairau obtenguen ua orientacion extra en tèmes d’actualitat e quotidiani ath torn dera eduacion des sòns hilhs e hilhes. María Vergés, còsso de Cultura, Educacion e Accion Sociau, manifestaue que “se tracte d’ua iniciativa que preten tanben apropar as familhes ara Escòla Mairau, entorn que se botgen es sòns hilhs diàriament, entà que coneishen mès d’apròp eth sòn foncionament e se’n senten part implicada”.
Peth moment era Escòla de Pairs e Mairs compde damb ua vintea d’inscrits e començarà era sua activitat pendent aguest mes de gèr. En aguest sens Vergés a avalorat positivament er interès des familhes ath madeish temps que mostraue era sua satisfaccion per “era bona dinamica existenta en centre e peth trabalh que desvolopen es professionaus dera Escòla Mairau dia a dia”.
Ajuntament de Vielha e Mijaran