Eth 99% d'aranesi consultadi favorables ath foment der occitan segontes era enquèsta der OPLO

Un còp realizada era prumèra macroenquèsta sus er estat dera lengua occitana, destaquen es donades deth 99% ena Val d’Aran favorables ath foment der occitan.

Er Ofici Public dera Lengua Occitana (OPLO) presentèc deluns 22 de junh, un auanç des principaus resultats dera enquèsta sociolingüistica sus era lengua occitana, qu’a amiat a tèrme telefonicament enes prumèrs mesi de 2020.

Era enquèsta que s’a amiat a bon tèrme en tres territòris, principaument enes regions de Naua Aquitània e Occitània, e qu’includís tanben donades dera Val d’Aran.

Se ben er estudi non compren tot er espaci occitan, arrepresente un important pas qualitatiu, tant pes sues dimensions (mès de 8.000 enquèstes), coma pera metodologia e resultats que mòstren es possibilitats d’auançar socialament en foment der occitan.

Es resultats principaus, presentadi per territòris, confirmen eth melhor estat der occitan en Aran per çò qu’ei des competéncies basiques (compreneson dera lengua, saber-la parlar, liéger e escríuer) damb uns indèxs mès nauti en comparason damb Naua Aquitània e Occitania, damb donades qu’artenhen mès de 40 punts de diferéncia.

                                              Naua Aquitània               Occitània             Val d’Aran

–          Compréner                       28 %                                 40 %                       86 %

–          Parlar                                   6 %                                  6 %                        61 %

–          Liéger                                   8 %                                 11 %                       63 %

–          Escríuer                               1 %                                   1 %                       39 %

Totun, cau soslinhar qu’era mòstra d’estudi en Aran a estat fèbla (sonque 100 enquèstes), e qu’es donades que presente son mens fiables qu’es des auti dus territòris estudiadi.

Era enquèsta qu’incorporaue tanben qüestions qualitatiues d’avaloracion sociau dera lengua.

Destaquen es donades de mès d’un 90 % favorables ath foment der occitan (un 99 % en Aran). Era reconeishença e denominacion dera lengua coma occitan, a estat tanben objècte d’avaloracion, damb uns resultadi d’acceptacion elevadi: un 82 % en Naua Aquitània, 92 % en Occitània e 73 % en Aran.

Er Ofici Public dera Lengua Occitana (OPLO), organisme qu’amasse diuèrses administracions publiques en Estat francés (estat, regions, departaments e collectivitats locaus) a estat eth responsable d’amiar er estudi e anoncièc era publicacion dera totalitat des donades e des resultats en mes de seteme que ven.

Info: OPLO