Eth Conselh dera Avogacia Catalana presentèc eth dia 26 de hereuèr dotze formularis en occitan, aranés en Aran, entà facilitar er emplec d’aguesta lengua, subertot ena Justícia.

Participèren en acte er Excm. Sr. Jordi Albareda, Degan deth Collegi dera Advocacia de Lhèida, que presidic era Presentacion, er Excm. Sr. Rogeli Montoliu, President dera Comission de Lengua deth Conselh dera Advocacia Catalana, era Sra. Ester Franquesa, directora generau de Politica Lingüistica, eth Sr. Jaume Montfort, director des Servicis Territoriaus deth Departament de Justícia en Lhèida e eth President der Institut d’Estudis Aranesi-Acadèmia aranesa dera lengua occitana, Jusèp Loís Sans.

Eth President der IEA-AALO, expliquèc qu’”aguesta naua iniciativa deth Conselh de Collègis d’avocats exercís ua pression en aguesta Acadèmia entà possar era creacion d’un Manuau de lenguatge juridic occitan. Ei de besonh. Vos demanam que collaboretz damb era Acadèmia aranesa dera lengua occitana enta possar era creacion d’aguest libre d’estil, d’aguest manuau, que tant de besonh comence a èster”.

Jusèp Loís Sans, ahigec “Era oficialitat der occitan provoquèc era articulacion dera Lei 35/2010, de 1 d’octobre, der occitan, aranés en Aran, qu’especifique que “er aranés ei era lengua normauments emplegada pes administracions catalanes enes sues relacions damb Aran”, qu’es “accions judiciaus oraus e escrites hètes en Aran en aranés son valides, sense besonh de revirada”, que “son valids es documents publics e privadi autrejadi ena lengua pròpria d’Aran”, e que “es actes juridics hèti en occitan an plea validesa e eficacitat”. Cau auer presenta aguesta Lei. E ac volem completar damb es observacions e manaments dera Lei 1/2015, deth 5 de hereuèr, de Regim Especiau d’Aran quan mos ditz que cau “impulsar er usatge dera lengua pròpria d’Aran enes airaus a on era normalizacion ei especiaument dificultosa, coma ei eth cas dera Administracion de Justícia”.

Aguesta ei ua iniciativa dera Comission de Lengua deth Conselh dera Advocacia Catalana, presa en marc des amassades d’analisi era situacion der occitan en mon deth dret que un viatge ar an realizen ena Val d’Aran, damb era Institut d’Estudis Aranesi.

Formularis : https://www.cicac.cat/arees/llengua/recursos-linguistics/eines-per-redactar-documents-juridics/formularis-juridics/

Info: Institut d’Estudis Aranesi-Acadèmia aranesa dera lengua occitana