Era mocion presentada peth govèrn deth Conselh Generau d’Aran entara consideracion des zònes ruraus e de montanha en impòst d’emissions de CO2 siguec aprovada per unanimitat en Plen.

Pr’amor dera modificacion dera Lei 16/2017, der 1 d’agost, deth cambi climatic, s’a incrementat er impòst sus es emissions de dioxid de carbòni des veïculs de traccion mecanica. Era mocion aprovada peth Conselh Generau reclame ua discriminacion positiva envèrs es zònes de montanha deuant eth pagament d’aguest tribut, era modificacion deth quau a entrat en vigor eth dia 31 de deseme de 2019.

“Demanam ath Parlament que considère que i a territòris a on auer un 4×4, per exemple, non ei un article de luxe, senon qu’ei un veïcul que per condicions meteorologiques o per qüestions de trabalh ei de besonh”, explique eth sindic d’Aran, Francés Boya, que demane que “es territòris de montanha agen ua consideracion diferenta en aguest impòst”.

Ath delà, atau coma senhale eth sindic: “enes territòris de montanha o zònes ruraus i a un transpòrt public limitat. En ua ciutat ua persona pòt víuer sense un veïcul, mès en un lòc coma era Val d’Aran aguest veïcul ei imprescindible”. Aguestes consideracions  aurien de hèr reflexionar ath Parlament e que modifiquèsse aguest impòst o ben que siguesse mès redusit en aqueri lòcs a on eth transpòrt public ei mès deficitari”.

En zònes coma era Val d’Aran “auer un coche 4×4 non ei un article de luxe, senon qu’ei un veïcul que per condicions meteorologiques o per qüestions de trabalh ei de besonh”, explique eth sindic d’Aran

Pendent aguest plen, eth sindic d’Aran tanben hèc mencion ath besonh d’establir un plan d’accèssi ath mèdi naturau entà suenhar es nòsti paisatges e “evitar era massificacion de coches enes paratges naturaus coma eth bòsc de Carlac, era bassa d’Arres o eth Saut deth Pish, entre d’auti”.

Info: Conselh Generau d’Aran