Cada dia, es tecnics esportius dera installacion aufriràn tutoriaus sus es rotines que se pòden hèr en diuèrses activitats: flexibilitat e tonificacion, gimnastica ipopressiva, iòga, abdominaus e karate entre d’auti.

A compdar d’aguesta setmana, e mentre sigue vigent er estat d’alarma, eth Palai de Gèu de Vielha publicarà enes hilats sociaus vidèos sus diuèrses practiques esportives qu’era gent pòt realizar des de casa.

Aguesti vidèos, que seràn penjadi a diari, seràn realizadi pes tecnics/monitors esportius d’aguesta installacion municipau, damb er objectiu de qu’era gent pogue hèr exercici pendent eth confinament, a quinsevolha ora deth dia.

En aguest sens, ja s’an publicat diuèrsi vidèos: Per un costat, un parelh de vidèos sus exercicis d’abdominaus, e tres vidèos elaborats peth departament de Salut dera Generalitat de Catalunya, amassa damb era Deputacion de Lhèida e er Institut Nacionau d’Educacion Fisica de Catalonha damb diuèrsi exercicis  basadi ena mobilitat, en trabalhs en tòrax-tronc (core), era fòrça e er equilibri. Enes pròplèu dies son previsti diuèrsi vidèos de flexibilitat e tonificacion, gimnastica ipopressiva, iòga e karate entre d’auti, se ben se pòt anar ampliant en foncion de coma auance era situacion.

Aguesti vidèos, qu’an ua durada entre 5 e 10 menutes, son dirigidi pes tecnics esportius, damb exercicis basics e senzilhs, entà que toti/es poguen seguir-les e hèr-les tranquillament des de casa.

Atau madeish, des deth perfil de Facebook de Karate Aran, eth monitor d’aguesta activitat, Angel Mateo, a publicat diuèrsi vidèos sus tutoriaus de kates.

“Aguesta iniciatiua ei un gran estrument entà qu’es nòsti/es vesins/ies poguen realizar activitat fisica des des sòns larèrs, pr’amor que pendent eth temps que dure er estat d’alarma, que com a minim serà d’un mes, ei fòrça important hèr exercici e mantier-se actius”, comente eth 2au tinent d’alcalde e còsso d’espòrts de Vielha e Mijaran, Alberto López. E hig que “ei ua grana escasença entà realizar exercici damb es professionaus qu’abituaument desvolòpen es activitats en Palai de Gèu, e qu’an fòrça exit d’acuelhuda pendent tot er an”.

[adrotate group=»1″]

Info: Ajuntament de Vielha e Mijaran