Per acòrd dera corporacion municipau en Plen Ordinari celebrat eth 24 de mai de 2017, s’a aprovat que des der Ajuntament de Vielha e Mijaran se reclame ath Govèrn era inversion der excedent, qu’er en cas d’aguest municipi ei de 1.284.310,38€.
A causa des restriccions imposades per Estat damb era Lei Organica d’Estabilitat Pressupostària es Ajuntaments, coma eth de Vielha e Mijaran, non pòden disposar deth sòn excedent entà atier es sòns besonhs d’inversion.
Era mocion aprovada a estat promoiguda pera Federacion Espanhòla de Municipis e Províncies (FEMP), e reclame ath Govèrn d’Espanha qu’adòpte iniciatiues legislatiues entà poder reinvertir er excedent sense auer de generar naui ingrèssi pera sua madeisha quantia.
Eth baile de Vielha e Mijaran, Juan Antonio Serrano, a declarat “Vielha e Mijaran a de besonh recuperar capacitat d’inversion entà poder atier es besonhs dera nòsta ciutadania e poder executar toti es projèctes que mos comprometérem, e resulte indispensable qu’eth Govèrn Español modifique aguesta nòrma injusta”.
Hònt: Ajuntament de Vielha e Mijaran