Eth Plen deth Conselh Generau d’Aran apròve iniciauments era modificacion deth regim de gestion deth servici d’emergéncies

Eth Plen tanben apròve eth padron de crubament dera taxa deth servici de remassada de lordères e era aplicacion der increment deth 1% enes retribucions deth personau deth sector public deth Conselh Generau d’Aran

 

Vielha 22 de hereuèr de 2016.- Eth Plen deth Conselh Generau d’Aran damb es vòts a favor deth Govèrn d’Aran e era abstencion deth rèste de grops, a aprovat iniciar er expedient entara modificacion en regim de gestion deth servici d’emergéncies, prevencion e escandilhament de huecs, rescats de montanha e proteccion civila.

Eth sindic d’Aran Carlos Barrera, a soslinhat que “era societat actuau ei cada viatge mès exigenta en çò que tanh ara demanda de prestacion des servicis d’emergéncies e era Val d’Aran non ei ua excepcion, per açò ei de besonh ua naua estructura entara gestion e era prestacion deth servici d’emergéncies”.

Barrera, a ahijut que “mès de 80% d’aguesta demanda ei de transpòrt e emergéncia sanitària. Era aprobacion dera naua Lei d’Aran a contunhat, permet iniciar eth procès cap ath modèl unic de gestion integrau deth servici d’emergéncies, damb çò qu’ei d’acòrd eth 99% deth collectiu qu’actuauments preste aguest servici”. Eth sindic d’Aran, tanben a explicat que “aguest nau modèl ei compatible damb er esperit de volontariat deth rèste dera estructura d’emergéncies, donques cau arrebrembar qu’ena Val d’Aran, enquia qu’eth Conselh Generau d’Aran artenhec eth traspàs de competéncies en transpòrt sanitari, era responsa des emergéncies les assumie era estructura de volontaris des parcs de pompièrs de Les, Bossòst e Vielha e Mijaran. En nau modèl, a cabuda ath rèste deth collectiu de volontaris, que contunhe en tot èster era colomna vertebrau der equip uman dera gestion des emergéncies”. Fin finala Carlos Barrera, a ahijut que “se estudiaràn formules entà activar e promòir entre es joens dera Val d’Aran, er esperit de formar part dera estructura d’emergéncies der Aran”.

Eth Plen celebrat aué deluns 22 de hereuèr de 2016, ena Casa deth Senhor d’Arròs, tanben a aprovat eth padron de crubament dera taxa deth servici de remassada de lordères e eth sòn tractament entad an 2016; e era aplicacion der increment retributiu deth 1% entath personau deth sector public deth Conselh Generau d’Aran.