Eth sindic d’Aran s’a interessat per conéisher eth calendari esportiu de Cester, atau coma es problematiques qu’an era e un bon nombre d’esportistes entà sufragar es despeses que se’n deriven dera sua dedicacion ar espòrt d’elit, en tot manifestar eth sòn compromís damb es esportistes aranesi.

Eth sindic d’Aran, Francés Boya, a recebut en Conselh Generau d’Aran ara esquiadora de hons aranesa e guanhadora dera 41au edicion dera Marxa Beret, Marta Cester, entà felicitar-la pes sòns contunhadi exits coma esportista d’elit e conéisher de prumèra man es sòns projèctes esportius.

“Damb Marta auem abordat eth sòn calendari esportiu, es pròplèu competicions qu’a en Soïssa e Noruega, e auem parlat des dificultats qu’an era e bona part d’esportistes entà sufragar es despeses d’aguesti desplaçaments”, a afirmat eth sindic d’Aran, en tot híger que “tanben auem tractat era dificultat qu’an entà reintegrar-se en mon laborau qu’an es esportistes coma era”.

En aguest sens, eth Sindic a manifestat que, “des deth govèrn deth Conselh dejà mos plantejam bèra estrategia tà ajudar aguesti esportistes qu’an representat ara Val d’Aran e qu’an de poder arténher ua integracion en món laborau que les permete compaginar damb es darrèrs ans d’activitat esportiua  entà esvitar aguesta problematica”.

Eth govèrn deth Conselh Generau d’Aran aufrís cada an es ajudes as esportistes estudiants dera Val d’Aran. Aguesta bèca, dirigida a joeni e joenes esportistes d’entre 12 e 22 ans, a coma objectiu motivar era contunhitat dera sua carrèra esportiva mentre seguissen damb es sòns estudis obligatòris (ESO) o post obligatòris (cicles formatius, estudis universitaris o titolacions de tecnic esportiu).

Info: Conselh Generau d’Aran