Vielha e Mijaran acuelherà era 4au edicion des Jornades Europèes de Cinèma de Montanha eth 14 e 15 de març.

Pendent er eveniment se projectaràn quate pellicules premiades en hestivau Mendi Film de Bilbao de 2019 e se liuraràn es premis deth 3au concors de cuertmetratges dera categoria escolara. Aguestes accions formen part deth projècte Interreg POCTEFA “Reiaume der Aneto”.

Er eveniment, qu’aurà lòc ena Audiovisuau de Vielha, començarà eth 14 de març entàs 19:00 damb eth liurament des prèmis deth 3au concors de cuertmetratges dera categoria escolara, qu’an presentat es alumnes de 4au, 5au e 6au cors de Primària dera Escòla Garona. Dempús s’encetaràn es projeccions damb eth cuertmetratge “Harria Herria” (Seccion Oficiau). Ara seguida se projectarà “Cholitas” (Prèmi deth Jurat). Eth 15 de març, entàs 19:00 se projectarà “Nebula” (Melhor Cuertmetratge) e dempús “Manaslu” (Prèmi deth Public).

Coma nauetat, eth Mendi Tour cambie de dies, en tot celebrar-se dissabte e dimenge, entà favorir qu’autant era gent que ven de dehòra, coma es vesins e vesies dera Val d’Aran, agen mès facilitats entà presenciar es pellicules.

Era entrada ath Mendi Tour serà de franc enquia completar er aforament dera sala. Se pòden recuélher es entrades en Ajuntament de Vielha e Mijaran en orari d’atencion ath public (de deluns a diuendres de 08:00 a 14:00) e ena Agéncia Kabi (Avenguda Pas d’Arró, 40, baishi, de 10:00 a 13:00 e de 17:00 a 20:00).