Des der Ajuntament de Vielha e Mijaran an premanit un ample calendari d’activitats entà Nadau, que compren des deth 14 de deseme enquiath 5 de gèr.

I traparatz activitats de tot tipe: hestivaus de musica, cinèma, parc infantil, patinatge, era Tronca de Nadau, teatre familhar, hèsta de Cap d’An e es ja tradicionaus visites de Pair Nadau e des Patges Reiaus, e era Cavaucada de Reis.

Demoram que vos agrade e qu’i participetz!

Tota era informacion ena imatge destacada.

Enguan, Vielha e Mijaran recupère bona part dera activitat abituau d’aguesta epòca, en tot destacar eth parc infantil, era visita de Pair Nadau, es sessions de cinèma familhar gratuït e era cavaucada de Reis, entre d’autes.

Eth 22 de deseme, comencen es activitats de Nadau qu’a premanit er Ajuntament de Vielha e Mijaran, e que s’esteneràn enquiath pròplèu 9 de gèr. Un ample conjunt d’activitats, en tot recuperar era accion pendent aguesta epòca der an, qu’en an 2020 non se poderen celebrar.

Eth Palai d’Espòrts de Vielha acuelherà eth tradicionau parc infantil deth 22 de deseme ath 8 de gèr, en orari des 17 as 21 ores damb un prètz de 6€. Es dies 22 de deseme e 8 de gèr (prumèr e darrèr dera activitat) seràn de pòrtes dubèrtes e gratuïtes. Eth parc infantil demorarà barrat es dies 25 de deseme e 5 de gèr.

Eth Centre de Joenessa “Antara”, que tanben hè diuèrses setmanes que torne a èster en foncionament, daurirà deth 22 de deseme ath 9 de gèr, en orari des 17 as 21 ores, entara mainadèra des 12 as 18 ans. Demorarà barrat es dies 25 de deseme e er 1 e 6 de gèr.

D’aute biais, era pista de gèu exteriora plaçada en carrèr dera Querimònia de Vielha, que ja se dauric entath pònt de deseme, contunharà dubèrta tanben en Nadau, en orari des 17:00 as 21:30. Aguesta activitat serà en foncionament enquiath 28 de hereuèr.

Es dies 23 e 24 de deseme, Vielha receberà era visita de Pair Nadau. En orari des 11 as 14 ores e des 17 as 21 ores lo poiratz trapar pes carrèrs, en tot cercar-lo entà poder-li liurar era vòsta carta damb es desirs entà Nadau.

Eth 28 de deseme i aurà un concèrt d’òrgue ena glèisa Sant Miquèu de Vielha entàs 20 ores, en tot èster era entrada gratuïta. Aguest concèrt ei plaçat laguens deth 23au Hestau de Musica dera Tardor “Orgues de Ponent i del Pirineu 2021”.

Enguan, tanben i aurà cinèma familhar gratuït en Era Audiovisuau. Eth 30 de deseme se projectarà “El cascanueces y los cuatro reinos” (film en castelhan aufrit pera Agrupacion Recreatiua d’Empleats de Productora de Fuerzas Motrices) e eth 4 de gèr se projectarà “Els Croods, una nova era” (film en catalan aufrit peth Circuit Urgellenc). Ambdues sessions seràn entàs 18 ores.

Eth 3 de gèr, era mainadèra receberà era visita des patges des Reis d’Orient, en orari des 19 as 21 ores enes cubèrts der Ajuntament de Vielha e Mijaran, entà que poguen liurar-les es cartes damb es sòns desirs entàs Reis.

E, fin finau, eth vèspe deth dia 5 de gèr, arribe eth dia mès demorat der an entàs mès petiti, damb era Cavaucada des Reis en Vielha. A compdar des 18 ores, Ses Magestats baisharàn de Gausac, en tot aufrir mochets peth camin enquia arribar ara plaça dera glèisa de Vielha.

A despièt de poder celebrar totes aguestes activitats, des der Ajuntament de Vielha e Mijaran rebremben qu’encara èm en epòca de pandémia e, per tant, ei de besonh extremar es precaucions entà poder gaudir pendent es hèstes de Nadau.