En Palau dera Generalitat s’a formalizat eth convèni de finançament der Aran enes tèrmes aprovadi pendent era amassada deth consell executiu dera Generalitat celebrat eth passat 11 de març ena sedença deth Conselh Generau d’Aran.
Er acòrd, qu’aurà ua durada de cinc ans a er objectiu qu’er Aran dispòse des recorsi de besonh entà auer autonomia de gestion entà desvolopar es sues foncions
Un des aspèctes mès destacables d’aguest acòrd ei era aplicacion d’un increment deth 10% sus eth conjunt de traspassi artenhudi peth Conselh Generau d’Aran en periòde 1991-2018, que serà repercutit en quate anualitats a compdar der an 2020.
Era part importanta de cadua d’aguestes anualitats ei que s’incorpòren ath finançament globau der an següent, e que per tant demorarà subjècte ara actualizacion des competéncies.
S’actualizarà damb un indèx restacat ara evolucion deth finançament dera Generalitat. En definitiva, er actuau pressupòst deth Conselh Generau d’Aran, de 23.144.436 €, se pòt veir ampliat ara fin d’aguest periòde enquia 29 milions d’èuros.
Era signatura deth convèni per part dera conselhèra dera Presidéncia, Elsa Artadi e eth sindic d’Aran, Carlos Barrera, s’a realizat pendent era amassada dera Comission Bilaterau entre eth Govèrn dera Generalitat e eth Conselh Generau d’Aran celebrada aué.
Per d’auta part, eth secretari generau deth Departament d’Interior, Brauli Duart, informèc ara Comission der acòrd institucionau d’ampliament dera dotacion economica peth traspàs dera competéncia deth Servici dera gestion integrau de Pompièrs e Emergéncies d’Aran.
Ena pròplèu Comission Bilaterau se formalizarà era aprobacion d’aguest acòrd, damb era volontat que sigue efectiu pendent eth pròplèu mes d’abriu.
Es negociacions der acòrd s’an esperlongat pendent es darrèri tres ans pera aplicacion der article 155 e era succession de desparièrs conselhèrs deuant dera conselheria d’Interior dera Generalitat.