Ager dimenge maitin, ath torn des 6:00 ores, se produsic un incendi en un atic plaçat ena planta superiora d’un immòble plurifamiliar deth numèro 5 deth Camin Pessòla, en pòble de Bagergue. Eth huec s’originèc en un des àtics e s’espandic parciaument tà ua auta unitat dera madeisha planta. Es trabalhs d’amortar eth huec, encara que efectius, an causat perjudicis per filtracions d’aigua en diuèrses viuendes des plantes inferiores.
Es Pompièrs d’Aran intervinguèren de seguida damb mejans pròpris e damb coordinacion de dues unitats des Bombèrs dera Generalitat de Catalunya, arribades d’Esterri d’Àneu e eth Pont de Suert. En totau, se mobilizèren sèt veïculs d’intervencion, includint escales, cisternes e unitats de logistica.
Era actuacion conjunta des còssi d’emergéncia a permetut contier eth huec e evitar qu’afectèsse es edificis vesins. Ath madeish temps, patrulhes des Mossos d’Esquadra de Vielha assegurèren eth perimètre, regulèren eth trànsit e collaborèren en evacuación preventiva d’unitats familhars.
Foto: EMD de Bagergue
Non i a auut cap de dammatge personau. Totun, es dammatges materiaus son importants.
Es causes der incendi se desconeishen actuaument.
Des dera Entitat Municipau Descentralizada de Bagergue arregraïssen era actuacion as còssi d’emergéncia e seguritat, e hèn arribar eth sòn supòrt a totes es persones afectades.
Info e foto: EMD de Bagergue