Comencen es prumèrs actes des Hèstes deth Huec 2019, catalogades coma Patrimoni Culturau dera Humanitat pera UNESCO.
Per ua part, en Les celebren eth dissabte 11 de mai era Shasclada der Haro. Pendent eth maitin es participaires ar acte s’amassen entà cercar e baishar deth bòsc eth haro der an que ven enquiara plaça deth pòble, dempús d’arrosegar-lo pes carrèrs, e començaràn a shasclar-lo, treiguer-li era pela entà que se pogue secar, e daurir-lo damb cunhes.
Un viatge qu’era soca ei shasclada, se deisharà secar, e se sauvarà enquiara hèsta de Sant Pere de junhsèga, quan serà plaçada en centre dera Plaça deth Haro, damb era actiuetat coneishuda coma era Quilha deth Haro. Entà Sant Joan der an 2020 que serà cremat.
Eth programa dera hèsta tanben conforme un dinar populara entà toti, concert de tarde damb Arredalh e un balh de net.
E d’auta part, eth dimenge 12 de mai en Arties, era celebracion dera Talhada deth Taro, damb era amassada des vesins tàs 9.30 ores ena Plaça Urtau que pujaran ath bòsc entà cercar un arbre, pròplèu taro der an que ven, que talharàn e arrosegaràn enquiàth pòble e lo shasclaràn entà que se pogue secar pendent tot er an. Dempús, dinar e balh en pòble.