Dempús der examen escrit que se realizarà aué en Barcelona, finalizarà eth cors 2016/17 d’Aranés, organizat e dirigit peth Departament de Cultura e Lengua deth Conselh Generau d’Aran.
Era setmana passada se realizèren es examens oraus en es dus centres e agèr er escrit en Vielha.
En totau, en aguest cors, an estat 110 es escolans matriculadi, repartidi enes classes de Vielha e de Barcelona enes diferenti nivèus.
En Vielha ei a on i a un major nombre d’escolans, damb un totau de 98 entre es quate nivèus, 33 en A, 16 més 1, per liure en A1, e en nivèu B an estat 18 es inscriti, ath delà de 15 presenciaus e 15 per liure en nivèu mès naut, eth C.
Pera sua banda en Barcelona an estat 12 es escolans que s’an presentat enguan ath cors d’aranés, més cau ahígeri es persones que s’inscriueren, e que s’a realizat peth prumèr còp, en grop de convèrsa dirigida a escolanes damb eth nivèu C finalizat.
Arrebrembar qu’es corsi d’aranés se realizen un dia per setmana damb dues ores de classes lectives pendent eth cors escolar, e s’amien a tèrme enes aules dera Escòla Garona de Vielha.
Era finalizacion deth cors e eth sòn aprovat dan dret ara titolacion d’aranés, sollicitada entara majoria de vacantes laboraus publiques oficiaus.