Montse de Burgos, Vesins e Vesies de Bossòst, ei era prumèra hemna en aucupar eth cargue de bailessa en Bossòst gràcies ar acòrd artenhut damb Convergéncia Aranesa.

Sisco Rodríguez de CDA serà eth tinent d’alcalde.

Mejançant un comunicat, Vesins e Vesies de Bossòst ha manifestat “Volem expressar eth nòste mès prigond arregraïment a toti vosati. Hè pòc mès d’un mes, un grop de vesins decidírem embarcar-mos en un projècte apassionant entà liderar eth nòste estimat municipi e gràcies ath supòrt de Convergéncia Aranesa, a qui arregraïm fòrça sincèraments era confidança en aguest projècte, auem assolidat era alternatiua en govèrn municipau. Mès sustot e seguraments çò de mès d’important, gràcies as vesins e vesies de Bossòst, tant as fòrça qu’eth 28 de mai passat optèren entà dar-mos era sua confidança coma aqueri qu’optèren entà dar-la a auti grops. Eth servici qu’aué iniciam ei gràcies a vosati e, sustot, entà TOTI vosati.

En iniciar aguesti quate ans de govèrn municipau, mos comprometem a trabalhar en dues vessants. En prumèr lòc, mos enfocaram ena gestion diària, en tot cercar melhorar era qualitat de vida de toti es nòsti vesins. Volem que Bossòst sigue un lòc segur, damb servicis publics eficienti e un ambient propici entath benèster de toti.

En dusau lòc, meteram era nòsta atencion ath futur sostenible deth nòste municipi. Ei moment de seiguer-mos amassa, es vesins e er ajuntament, entà reflexionar sus eth legat que volem deishar as pròplèus generacions. Eth nòste objectiu ei influïr positivaments en desvolopament de Bossòst, en tot respectar tostemp era diuersitat e eth liure arbitri de cada individu.

Ath delà, mos enorgulhís compartir aguest moment istoric, donques per prumèr còp, ua hemna ostentarà era alcaldia de Bossòst. Aguest succès ei un pas important tara equitat e eth fortiment deth papèr des hemnes ena gestion publica. Contunham impulsant era sua participacion e lideratge en toti es encastres.

Trabalharam incansablement damb passion, dedicacion e transparéncia entà complir es vòstes expectatives e bastir un Bossòst prospèr e vibrant.

Seguim tà deuant amassa! Eth futur de Bossòst ei enes nòstes mans”.

Per a sua part, Unitat d’Aran (UA), ha explicat tanben en un comunicat enes hilats sociaus que “UA se reivindique coma prumèra fòrça de Bossòst e regrète eth pacte de Vesins-Convergéncia pera sua manca de transparencia”.

Eth grop d’UA se reivindique coma prumèra fòrça de Bossòst, era mès votada eth 28 M. “Aguest hèt mos anime a assomir era nòsta responsabilitat entà exercir ua labor d’oposicion rigorosa e constructiva”, a explicat eth pòrtavotz Amador Marqués.

Eth còsso a regretat eth pacte de govèrn entre Vesins e Convergéncia “perque ei contradictòri damb es propòstes de transparéncia e non adscripcion politica”. “Ei un pacte legitim mès clarament politic e precari, er unic objectiu deth quau ei expulsar a UA deth govèrn locau”, a hijut.

Marqués a assegurat que “d’ençà d’UA seram atents a qu’es projèctes tramitadi e aprovadi per anterior govèrn poguen executar-se enes pròplèu ans”.

Info: Vesins e Vesies de Bossòst / Unitat d’Aran