Mossèn Jusèp Amiell Solè, vesin de Garòs, e ua des figures mès subergessentes dera societat aranesa, ei estat un proòm aranés.
Mn Amiell, medalha d’òr deth Conselh Generau d’Aran en 2010 e Crotz de Sant Jordi dera Generalitat de Catalunya en 2012 e Prèmi Lengua Viua en 2004, a estat un referent dera cultura e lengua d’Aran en tot èster un destacat actor ena preservacion e promocion deth patrimòni e era istòria d’Aran.
Foto: Aran Notícies
Eth caperan, qu’ostentèc eth cargue d’archiprèste d’Aran pendent 14 ans, revirèc eth Nau Testament ara lengua aranesa, e siguec un des impulsors der aranés ena litorgia religiosa. Atau madeish, amièc un intens trabalh de recerca ath torn dera istòria d’Aran, en tot èster un des sòns maxims exponents e un gran coneishedor, entre d’auti, dera vida e òbra de Mn. Jusèp Condò Sambeat.
Er autrejament deth Pair Nòste ara Capèla deth Pater Noster de Jerusalem ei un aute des sòns trabalhs mès destacadi.
Eth Conselh Generau d’Aran a decretat dus dies de dò oficiau en tota era Val d’Aran coma reconeishença ara sua aportacion desinteressada ara societat aranesa e ara preservacion des sòns valors, lengua e cultura.
Foto: Aran Notícies
Era missa exequiau s’harà deman dijaus, 19 de deseme, entàs 11:30 ores, ena glèisa de San Miquèu de Vielha.
Des d’Aran Notícies, mos somam ath dò peth traspàs de Mn. Jusèp Amiell e Solé.
Info: Aran Notícies / Conselh Generau d’Aran
Fotos: Aran Notícies