Eth passat 24 de junhsèga, er Ajuntament de Vielha e Mijaran treiguec a concors er arrendament d’ua parcèla urbana deth municipi damb er objectiu de crear un parcatge de caravanes e autocaravanes.
Era explotacion d’aguesta parcèla anarà a cargue d’ua enterpresa privada. Eth tèrme de presentacion de sollicituds se tròbe finalizat des deth dia 8 d’agost. A dia d’aué, se trobe en procès d’adjudicacion e ara demora deth liurament des documents de besonh per part des enterpreses interessades entara explotacion dera parcèla.
Eth principau objectiu dera creacion d’aguest servici ei convertir Vielha e Mijaran en un municipi toristic de referéncia enes Pirenèus e en sector deth caravaning, un torisme fòrça important e a tier en compde per toti aqueri municipis toristics.
Entà Juan Antonio Serrano, baile de Vielha e Mijaran “ei de vitau importància era creacion d’un lòc de parcatge entà autocaravanes e caravanes, donques qu’ath delà d’èster un servici de besonh entara captacion deth public autocaravanista, tanben se convertirà en un servici qu’apuarà era economia locau gràciess ara creacion de lòcs de trabalh en municipi”.
Hònt: Ajuntament de Vielha e Mijaran