Eth 25 de noveme er Institut d’Estudis Aranesi-Acadèmia aranesa dera lengua occitana a assistit a ua amassada damb eth Molt Aunorable Sr.Carles Puigdemont, President dera Generalitat. Eth President a recebut as membres der IEA-AALO en Palai dera Generalitat tàs 13:30 ores.
Es membres que s’an amassat en Barcelona damb eth President dera Generalitat an estat, eth President der IEA-AALO, Jusèp Loís Sans, era Vicepresidenta der IEA-AALO, Angelina Cases, era Secretària der IEA-AALO, Ròsa Salgueiro e eth President dera Seccion aranesa der IEA-AALO, Jèp de Montoya.
En desvolopament dera amassada s’a hèt era presentacion der Institut d’Estudis Aranesi-Acadèmia aranesa dera lengua occitana, en tot explicar era sua estructura, es membres que la compòsen, eth procés de creacion, era forma de trabalh,…
Era Acadèmia tanben a exposat ath President dera Generalitat es principis der Institut d’Estudis Aranesi-Acadèmia aranesa dera lengua occitana, per miei dera Declaracion de 8 de juriòl de 2016. S’a mantengut ua reflexion conjunta sus eth papèr der aranés en Catalonha e sus era sua interrelacion damb era lengua catalana. S’a mantengut un debat sus era possibilitat qu’era proteccion der aranés està dant a Catalonha de presentar-se coma un territòri, damb ues estructures politiques que desvolòpen un tractament absolutament respectuós damb ua minoria, en tot crear un exemple mondiau.
Un viatge metuts en antecedents era direccion dera Acadèmia a aprofitat entà presentar ath President dera Generalitat es publicacions der Institut d’Estudis Aranesi-Acadèmia aranesa dera lengua occitana, entre es que s’a destacat era Gramatica basica der occitan aranés e es normes ortografiques der occitan estandard.
Eth President der IEA-AALO a comunicat ath President dera Generalitat qu’era Acadèmia recep ena actualitat e des deth començament, un bon tracte per part deth Conselh Generau d’Aran e dera Generalitat de Catalonha, especiaument des Departaments de Cultura, Ensenyament e Justícia. Es dues institucions an trabalhat de comun acòrd ena potenciacion dera Acadèmia aranesa dera lengua occitana.
Er IEA-AALO a demanat ath President dera Generalitat que les ajude ena internacionalizacion dera Acadèmia per miei dera inclusion en estructures dera Generalitat qu’an ua dimension internacionau.
Eth President Puigdemont s’a interessat fòrça pera Acadèmia e a explicitat era importància qu’a entà Catalonha, a demostrat qu’ei un bon coneishedor dera cultura e dera realitat occitana e a manifestat tot eth supòrt de besonh entà potenciar era institucion.
Hont: IEA-ALLO
Fotos: Jordi Bedmar