Pendent eth plen deth Conselh Generau d’Aran, Francés Boya, conselhèr pòrtaveu deth grup d’UA, a reclamat ath govèrn de Convergéncia ena maxima institucion que solucione de forma inmediata era manca de personau enes servicis d’emergéncies aranesi, un deficit qu’obligue as pompièrs aranesi a trabalhar ores en excès en perjudici dera sua participacion coma pompièrs volontaris.

Unitat d’Aran a reclamat ath govèrn de Convergéncia en Conselh Generau qu’amplie era plantilha de personau des servicis d’emergéncies dera Val d’Aran pr’amor que, actuaument, se trape totaument infradimensionada, causa qu’obligue ath personau actuau a hèr mès ores des conveniades.

Era negociacion deth traspàs dera competéncia damb era Generalitat hè ans que dure. Pendent eth govèrn d’UA en Conselh Generau, Convergéncia Democratica Aranesa s’oposèc a un acòrd damb era Generalitat entà assegurar eth finançament deth servici, en tot allegar qu’era institucion aranesa non compdaue damb competéncies. “Aguest siguec un des arguments deth senhor Barrera entà que se tramitèsse, tant deprèssa coma se he’c, era modificacion dera Lei d’Aran qu’auie de dotar de competéncies ath Conselh Generau”, explique Francés Boya, “totun era Lei ei aprovada en 2015 e, non i a finançament e era Generalitat seguís dident çò de madeish qu’en 2010”, manifèste Boya e hig que, “es contradiccions deth Sindic son mès que evidentes, ja qu’ère eth madeish qui assegurèc qu’era Generalitat financiarie eth nau sistèma d’emergéncies aranés, causa que demòstre nauament era sua manca de capacitat tà governar”.

En Plen Unitat d’Aran a demanat tanben peth nau Plan d’Atencion ara Gent Grana anonciat peth Conselh Generau: “des d’UA tostemp daram supòrt a quinsevolh accion que melhore era vida des nòsti grani, totun aguest Plan ei ua incògnita tant per coma se finançarie coma per coma s’amiarie a tèrme”, declaraue Boya e higie, en referéncia ath suenh dera gent grana, que “a dia d’aué encara non s’a signat eth convèni damb era Generalitat entà assegurar eth finançament dera residéncia de Les”.

Entà UA i a dejà mòstres clares d’un bloqueg politic ena màxima institucion aranesa, frut dera manca de interlocucion politica ena Generalitat de Catalunya, mès tanben pera manca d’estratègia e orientacion politica deth govèrn de Convergéncia en Aran.

Hònt: Unitat d’Aran