Aué s’a celebrat eth plen d’aprobacion deth pressupòst de 2019 deth Conselh Generau a on s’a evidenciat qu’es deficiéncies en finançament, atau coma es traspassi pendents de hè temps, demoren sense solucionar-se e sense respòsta politica per part dera Generalitat.

Era maxima Institucion aranesa a aprobat aué eth pressupòst tar an 2019 de 29.349.297’32€, un pressupòst que se manten en shifres similares as des darrèri ans e en qué eth deficit mès important ei era manca de capacitat d’inversion deth Conselh Generau d’Aran.

Atau donc, eth govèrn d’Aran arrossègue de 2011 estant, quan era Generalitat anullèc per iniciativa pròpria eth sistèma de finançament aranés, ua situacion de precarietat financèra que provòque qu’eth Conselh Generau non pogue desvolopar es sues foncions damb eth rigor e qualitat de besonh, ath temps que l’inabilite entà amiar a tèrme inversions e accions pròpries der autogovèrn.

Entà Unitat d’Aran aguesta situacion implique qu’eth govèrn aranés age totaument limitada era sua accion d’autogovèrn, ei a díder, que sonque pogue gestionar es competéncies traspassades pera Generalitat, traspassi que, coma eth de sanitat, son tanben infrafinançadi atau e coma eth pròpri Sindic a reconeishut en quauaqua ocasion.

“Tot e que, pendent er an 2012 eth pressupòst dera Generalitat patic ua grana retalhada, a compdar de 2014 aguest aumentèc exponenciaument. Totun, eth pressupòst entà Aran seguic en descens enquia estancar-se es darrèri ans” manifestaue Francés Boya, conselhèr pòrtaveu d’UA,  e higie que “non sonque açò, se non qu’era inversion dera Generalitat en Aran a baishat en picat, e entre 2010 e 2017 eth balanç ei d’un -85% d’inversion, en tot qu’en d’auti territòris deth Pirenèu a estat mès nauta”.

Boya a declarat tanben que, maugrat era manca de pressupòst, eth govèrn de CDA aurie d’auer desvolopat accions e projèctes tà amiar a tèrme iniciatives en àmbit dera desestacionalizacion toritistica, dera cultura e lengua, atau coma en iniciatives tara melhora de problematiques sociaus coma er accès ara viuenda, supòrt as joeni emprenedors o der envielhiment actiu, “causa que non a passat, en tot hèr patent que Convergéncia non a un projècte entà Aran”.

Tà Unitat d’Aran resulte dejà evident qu’era etapa deth Sindic Barrera represente un projècte esgotat e qu’era Val d’Aran a de besonh un cambi.

Hònt: Unitat d’Aran