Era drastica retalhada de recorsi, er emplec de varietats der occitan que non son era aranesa e era eliminacion premeditada dera denominacion istorica dera lengua pròpria d’Aran, er aranés, en totes es publicacions deth govèrn catalan en tot substituïr-la pera d’occitan, atau coma er hèt qu’era Lei der Aranés de 2010 encara non s’a desplegat, demòstren era totau manca de respècte e d’interés qu’era Generalitat a ena lengua pròpria d’Aran
Pendent es darrèri ueit ans era Generalitat de Catalunya a metut en foncionament ua politica lingüistica respècte der aranés basada en mensprètz e abandon qu’a portat a que, a dia d’aué, age retalhat en un 40% es recorsi que destine tara lengua pròpria d’Aran, en tot passar des 100.000€ annaus que i destinèc en 2010, damb eth govèrn d’UA en Conselh Generau, as 60.000€ actuaus, tot e qu’eth pressupòst en matèria de politica lingüisitica deth govèrn de Catalunya entath catalan supère es 22 milions d’euros.
Ad aguesta realitat i cau híger er hèt qu’era Generalitat a cambiat era denominacion dera lengua pròpria d’Aran, er aranés, per occitan o occitan d’Aran, enes sues publicacions e planes web, en tot implementar ua mala praxis que sonque a provocat confusion ath torn dera lengua, quan aguesta passe peth pitjor moment dera sua istòria, en tot èster a un 17% d’usatge sociau.
Maria Vergés, conselhèra generau d’UA, manifestaue que “ei evident era identitat occitana der aranés, mès aquerò non ei rason entà qu’era nòsta varietat, aquera pera que, autant Generalitat coma Conselh Generau, an de protegir e potenciar, sigue acornerada e menspredada d’aguesta forma” e higie que “es darrèri ans auem vist coma era Generalitat retalhaue es recorsi tar aranés e substituïe de forma intencionada eth nòm d’aranés peth d’occitan sense avalorar er impacte qu’aquerò supause en ua lengua fragila e en perilh coma era nòsta atau coma er enorme risc de desafeccion des parlants, que reconeishen era sua lengua a trauès deth nòm damb que l’an coneishut tostemp”.
Entà Unitat d’Aran, eth govèrn dera Generalitat s’a apropriat dera denominacion dera lengua pròpria d’Aran, ua apropiacion que correspon unicament ath pòble aranés. Atau donc son nombroses es ocasions en que des d’Unitat d’Aran s’a reclamat ua rectificacion d’aguesta mala praxis, autant en plen deth Conselh Generau coma en d’auti airaus. “Era incapacitat deth Sindic d’Aran entà exigir respècte pera lengua pròpria d’Aran e ath pòble aranés ei constatada” afirme Vergés “ua incapacitat entà deféner es interèssi des aranesi que tanben se manifèste ena manca de projècte tar aranés e tath país”.
Des d’Unitat d’Aran se considère qu’es responsables dera politica lingüistica en Catalunya aurien de dimitir pr’amor qu’utilizen er aranés coma un esturment politic ath servici des sòns interèssi partidaris e non empleguen es recorsi e estratègies de besonh entà preserva-lo e impulsar-lo.
“Era nòsta lengua pròpria, er aranés, ei probablament eth màger signe d’identitat que possedim e, actuaument, ei mautractat de forma constant peth govèrn catalan. Calerie demanar-se qué passarie s’aguest mautracte l’amièsse a tèrme eth govèrn der Estat respècte deth catalan”, declaraue Vergés.