Ager deluns se celebrèc eth plen ordinari deth Conselh Generau d’Aran a on s’aprovèc ua naua modificacion de crèdit en tot emplegar eth romanent de tresaureria, ei a díder, aqueri recorsi estauviadi que se pòden destinar a politiques pròpries dehòra des competéncies traspassades.

Unitat d’Aran se mòstre critica tamb era situacion economica e financèra que viu eth Conselh Generau, qu’enes darrèri ans a vist coma eth sòn romanent de tresaureria passaue de 7’2 milions d’èuros en exercici 2017 as actuaus 1’6 milions d’euros dempús d’aguesta naua modificacion.

Eth conselhèr portaveu d’UA Francés Boya, a advertit que “se seguís en aguesta linha era situacion financèra dera maxima institucion aranesa non se poirà sostier” e remercaue que “n’aguesti moments era manca de compromís e implicacion dera Generalitat en tot mantier es retalhades ath pressupòst aranés per un costat, e era incapacitat deth govèrn de CDA en Conselh entà gestionar era maxima institucion, hèn que, per exemple, es estauvis deth Conselh agen de servir tà finançar, n’aguesta darrèra modificacion, ara sanitat aranesa damb 200.000€”.

Eth conselhèr portaveu manifestaue que, “a pògui mesi d’acabar era legislatura, era sanitat aranesa contunhe tamb un deficit de mès de 2 milions d’èuros que, n’ aguest moment a d’èster financiada per hons de romanent deth Conselh Generau d’Aran”, e higíe, “aguest hèt met en evidéncia era insostenibilitat dera situacion financèra deth Conselh Generau e, ath viatge, era insosteniblitat d’un govèrn que non ei capable de revertir era situacion ne de reclamar ara Generalitat eth deute qu’a damb Aran”.

Cau rebrembar qu’era naua Lei d’Aran, aprobada en hereuèr de 2015, metie un plaç maxim de tres ans entà desvolopar eth nau modèl de finançament d’Aran, e que per tant aqueth plaç a caducat. Boya explicaue que “ath sòn temps, era manca d’un sistèma de finançament impossibilite era implementacion de nau romanent en Conselh Generau”

Des deth partit aranés se trape aguest hèt fòrça grèu pr’amor que “per un costat, se constatam eth reiterat incompliment dera Generalitat damb Aran, pr’amor que seguís sense desplegar n’era Lei d’Aran n’era Lei der Aranés, e per un aute, eth risc de que, en un moment d’inestabilitat coma en qué se tròben es institucions catalanes, que seguissen sense pressupòsti, era estabilitat economica e financèra deth Conselh Generau pòt entrar en crisi”.

Hònt: Unitat d’Aran