Damb gessuda ena Val d’Aran-Vielha eth 10 de junhsèga, era etapa aranesa ei ua des escuelhudes entà èster emetuda integralaments en dirècte per television
Vielha, 10 de mai de 2016.- Eth Conselh Generau d’Aran presentarà eth pròplèu dijaus 19 de mai era nauau etapa deth Tour de França 2016 que se disputarà per tèrres araneses. Er acte, que se celebrarà en burèu de Torisme dera Val d’Aran e Baqueira Beret en Toulouse, compdarà damb era preséncia de Luís Carlos Medina, vicesindic d’Aran e conselhèr d’Espòrts e Joenessa; Anna Díaz, conselhèra de Torisme e Desvolopament Economic e José Antonio Boya, conselhèr de Territòri deth Conselh Generau d’Aran.
Damb un traçat inedit enquia ara ena istòria dera carrèra, era nauau etapa deth Tour de França 2016 gesserà de Vielha eth pròplèu 10 de junhsèga e aurà un recorregut de 184,5 Km en tot passar per 5 pòrts de montanha. Era etapa aranesa ei ua des escuelhudes entà èster emetuda integralaments en dirècte per television.
Pendent er acte de presentacion dera etapa, es conselhèrs José Antonio Boya e Anna Díaz, daràn a conéisher es detalhs organizatius e es dispositius operatius previsti entad aguest eveniment, que compdarà damb era coordinacion entre es còssi e fòrces de seguretat francesa e espanhòla (Garde Républicaine dera Gendarmerie Francesa, Mossos d’Esquadra, Policia Nacionau e Guardia Civiu), ath sòn pas pes carretères catalanes (C-28, C-13, N-260, N-145).
Des deth Conselh Generau d’Aran, s’a preparat un plan d’accions, quauques d’eres pendent es mesi de mai e junh prealable ara celebracion dera etapa ena Val de Aran, que compdarà damb era preséncia de ciclistes qu’an concorrut en anteriores edicions deth Tour de França, que convertirà ath pòrt deth Portilhon en ua referéncia entath ciclotorisme.
Eth madeish dia 10 de junhsèga en Vielha, s’amiaràn a tèrme accions qu’includissen activitats que participaràn en eth es escolars dera Val d’Aran e aficionadi ath ciclotorisme.
Mès informacion: http://www.letour.fr/le-tour/2016/fr/etape-9.html
