Aguest maitin en plen deth Conselh Generau d’Aran s’a dat compde dera renóncia ath cargue deth conselhèr generau d’Aran, per terçon de Quate Lòcs, d’Amador Marqués.
Amador Marqués, renòncie ath cargue, dempús d’un recorrut iniciat en 2011, dera man des sindics Paco Boya e Maria Vergés, en representacion deth pòble aranés e deth terçon de Quate Lòcs.
Marqués a explicat enes sòns hilats sociaus que “d’aguesta forma, en nòm deth mèn partit, Unitat d’Aran, poderè dedicar-me de forma mès eficienta as mies responsabilitats en Congrès des Deputats, per prumèr còp ena istòria, e en Ajuntament de Bossòst, municipi qu’estimi e auem de prebotjar, tostemp ath servici d’Aran e dera gent”.
E a ahijut: “dèishi eth Conselh Generau d’Aran en bones mans, damb un lideratge clar e solvent, conselhèrs e conselhères illusionadi e determinadi e uns trabalhadors e trabalhadores as quaus sonque pogui reconéisher peth sòn bon mestratge ena foncion publica”.
Pera sua part, era síndica d’Aran, Maria Vergés, a volut: “arregraïr era sua dedicacion e entrèga pendent aguesti darrèri ans, e era sua fèrma volontat per trabalhar tostemp a favor deth territòri e dera sua gent” e a destacat tanben: “era importància qu’a entath desvolopament territoriau e sociau dera Val d’Aran poder compdar damb representacion en Estat, en aguest cas, en tot compdar damb eth prumèr deputat aranés en Congrès”.
Info: Amador Marqués / Aran Notícies
Fotos: Amador Marqués / Conselh Generau d’Aran