Eth secretari generau d’UA mantenguec tanben ua amassada damb eth Ministre d’Agricultura, Luis Planas damb qui tractèc sus era problematica ocasionada damb era reintroduccion der ós en Pirenèu
Eth passat dia 10 d’octobre Paco Boya s’amassaue en Madrid, ena sedença deth MAPA tamb eth Ministre d’Agricultura, Pesca e Alimentacion, Luis Planas. Boya li transmetec era preocupacion que i a en Pirenèu e en Aran ath torn dera problematica derivada pera reintroduccion der ós deth programa LIFE. Boya expliquèc que, “eth nòste territòri patís e se sent totauments abandonat”, e plantegèc ath ministre eth “besonh d’inclodir as agents deth territòri ena prenuda de decisions coma era reintroduccion de fauna sauvatja que, n’aguesti moments, ei ua grèu miaça entath mantenement dera ramaderia extensiva en tot eth Pirenèu”. En aguest sens, demanèc ath Ministre que se prenen mesures efectives de supòrt ara ramaderia entà garantir era contunhitat d’aguesta activitat.
Atau madeish, eth Secretari Generau d’UA, tanben s’a amassat tamb era Ministra de Politica Territoriau, Meritxell Batet. Ena aguesta amassada entre d’auti ahèrs, s’an tractat ahèrs relacionats tamb es problèmes qu’an es zònes de montanha. Boya a hèt especiau incís enes ahèrs que tanhen a Aran, coma son era manca de desplegament des leis d’Aran e der aranés per part dera Generalitat. Damb era prumèra s’auie de crear un sistèma de finançament qu’encara non ei realitat d’ençà que s’aprovèc era lei en 2010. Boya tanben li a hèt a arribar era preocupacion pera lengua pròpria d’Aran, er aranés, e a demanat màger implicacion der Estat ena sua proteccion. Cau rebrembar qu’era Generalitat retalhèc era dotacion tar aranés a 60.000euros annaus e encara non a aplicat era lei de 2015 aprovada peth Parlament.