Eth 2 de gèr de 1997, morie Joan Coromines, filològ, lexicològ e etimològ català qu’escriuec «Vocabulario aranés» en 1931 e «El parlar de la Vall d’Aran» en 1990. Dues òbres qu’an estat essenciaus entath desvolopament dera lengua aranesa.
Eth 15 d’agost de 2017, laguens des actes dera Hèsta Major de Vilamòs auec lòc un emotiu acte d’aumenatge deth pòble de Vilamòs ath illustre filològ Joan Coromines e Vigneaux, de qui ère eth vintau aniversari dera sua mòrt.
Joan Coromines que escriuec ua bona part dera sua obra ena casa dera plaça de Vilamòs. Justaments ena façada dera casa dera plaça de Vilamòs se descorbic ua placa en arrrebrembe deth mestre, tamb era inscripcion:
“Eth Pòble de Vilamòs a Joan Coromines e Vigneaux (Barcelona, 1905 – Pineda de Mar, 1997) Illustre filològ, etimològ e lexicograf. En XXau anniversari dera sua mòrt e en arregraïment peth sòn gran trebalh de conservacion e difusion der aranés e per auer trigat eth pòble de Vilamòs e aguesta casa entà escríuer era sua Tèsi Doctorau e era grana òbra dera lingüistica “El parlar de la Vall d’Aran”.
Er acte que siguec organizat per Ajuntament de Vilamòs tamb era collaboracion deth Conselh Generau d’Aran, der Institut d’Estudis Aranesi-Acadèmia aranesa dera lengua occitana e era Fundacion Pere Coromines e pera Associacon Es Paums.
[adrotate group=»1″]